ഇ​ഷ്ട​ദേ​വ​താ​ ധ്യാ​നം​ - ശുഭചിന്ത

അമൃതവാണി

ചഞ്ചലതയാണ് മനസ്സിന്റെ സ്വഭാവം. ഒരു നിമിഷം ഒന്നിനെക്കുറിച്ച് ചിന്തിക്കും. അടുത്ത നിമിഷം മറ്റൊന്നിനെക്കുറിച്ചായിരിക്കും ചിന്ത. മനസ്സിൽ ചിന്തകൾ ഒഴിഞ്ഞനേരമില്ല. ഇങ്ങനെയുള്ള മനസ്സിനെ നിശ്ചലതയിലേക്ക് കൊണ്ടുവരാനുള്ള മാർഗ്ഗമാണ് ധ്യാനം. പല ധ്യാനരീതികൾ ഉള്ളതിൽ ഉത്തമമായ ഒന്നാണ് ഇഷ്ടദൈവത്തിന്റെ രൂപധ്യാനം.

എല്ലാ ദിവസവും കൃത്യസമയത്ത് ധ്യാനിക്കണം. ഇഷ്ടദൈവത്തിന്റെ ചിത്രം വ്യക്തമായി കാണത്തക്കവണ്ണം മുന്നിൽവച്ചിരിക്കണം. ആസനത്തിലിരുന്ന് നടുനിവർന്ന് ഏകാഗ്രതയോടെ ആ രൂപത്തിലേക്ക് നോക്കുക. അവിടുത്തെ ശിരസിൽ വച്ചിരിക്കുന്ന കിരീടം, തലമുടി, നെറ്റിത്തടം, പുരികം, കണ്ണുകൾ, കാതുകൾ, കർണ്ണാഭരണങ്ങൾ, മൂക്ക്, മൂക്കുത്തി, കവിൾത്തടം, ചുണ്ടുകൾ ഇങ്ങനെ ഓരോന്നും ഏകാഗ്രതയോടെ അൽപനിമിഷം നോക്കിയിരിക്കുക. പിന്നെ കണ്ണടച്ച് ആ മുഖം മനസ്സിൽ കാണുക.

മനസ്സിലെ രൂപം മങ്ങുമ്പോൾ വീണ്ടും കണ്ണുതുറന്ന് മുന്നിലിരിക്കുന്ന ചിത്രത്തിലേക്ക് ശ്രദ്ധാപൂർവ്വം നോക്കണം. വീണ്ടും കണ്ണടച്ച് ആ മുഖകമലം മനസ്സിൽ കാണുക. ഏകാഗ്രത വന്നാൽ പിന്നെ പൂർണരൂപം തന്നെ ധ്യാനിക്കാം.

രൂപത്തിന് അപ്പുറം കടക്കാൻ വേണ്ടിയാണ് രൂപധ്യാനം. നട്ടുച്ചക്ക് നിഴൽ മറയുന്നതുപോലെ ഏകാഗ്രത പൂർണമാകുമ്പോൾ മുഖം മറയും. ധ്യാനത്തിലൂടെ ആരോഗ്യം, ബുദ്ധികൂർമ്മത, ഓർമ്മശക്തി, വാസനാക്ഷയം, ചിത്തശക്തി എല്ലാം കൈവരും.