കണ്ടോരുണ്ടോ എന്റെ കണ്ണനേ

കണ്ടോരുണ്ടോ എന്റെ കണ്ണനേ നീല
ത്തണ്ടാരണിമണിവർണ്ണനേ
കണ്ടാൽക്കൊതിക്കുമെൻകണ്ണനേ നിങ്ങള്‍ കണ്ടായോ
താമരക്കണ്ണനേ
വെണ്ണയും പാലും നുകരുവാൻ ചാരു
നൃത്തം ചവിട്ടുന്ന ബാലനെ
കണ്ണനാമുണ്ണിയെ കണ്ടുവോ നിങ്ങള്‍
ഉണ്ണിഗോപാലനെ കണ്ടുവോ
കോലം കുഴലുമായെപ്പോഴും കൊച്ചു
കാലിക്കിടാങ്ങളെ മേയ്ക്കുവോൻ
ഗോലോകപാലകനാണവൻ നിത്യം
ഭൂലോകപാലനുമാണല്ലോ
പുല്ലാങ്കുഴലൂതിവന്നവൻ കാട്ടി
ലുല്ലാസമായി നടന്നവൻ
മല്ലനെ പോരാടി വെന്നവൻ കൊച്ചു
മല്ലാക്ഷിമാരുമായ് നിന്നവൻ
പർവ്വതത്തെ പൊക്കിനിന്നവൻ കംസ
ഗർവ്വങ്ങളെ തച്ചുകൊന്നവൻ
സർവ്വലോകത്തേയും വെന്നവൻ നിത്യം
സർവ്വർക്കും സംപൂജ്യനാണവൻ

കണ്ടോരുണ്ടോ എന്റെ കണ്ണനെ നീല
ത്തണ്ടാരണിമണിവർണ്ണനെ
കണ്ടാല്‍ക്കൊതിക്കുമെൻകണ്ണനെ നിങ്ങള്‍
കണ്ടായോ താമരക്കണ്ണനെ