ഏവമേവ മഹാരവോ യത്ര നിപതിതം പുരുഷം ക്രവ്യാദാ
നാമ രുരവസ്തം ക്രവ്യേണ ഘാതയന്തി യഃ കേവലം ദേഹംഭരഃ (5-26-12)
സൃഷ്ടിയുടെ നാനാത്വത്തെപ്പറ്റിയും നരകങ്ങളെപ്പറ്റിയും രാജാവ്‌ ചോദിച്ചതിനുത്തരമായി ശുകമുനി പറഞ്ഞുഃ
നരകങ്ങള്‍ ഈ വിശ്വത്തില്‍ തന്നെയാണുളളത്‌. തെക്കേ അറ്റത്ത്‌. അവിടെയാണ്‌ കാലത്തിന്‍റേയും മരണത്തിന്‍റേയും അധിദേവതയായ യമന്‍ വാഴുന്നത്‌. സൂര്യപുത്രനാണദ്ദേഹം. ജീവനെ അദ്ദേഹത്തിന്റെ മുന്നില്‍ കൊണ്ടുവരുമ്പോള്‍ തന്റെ ദിവ്യനിയമങ്ങളനുസരിച്ച്‌ യമന്‍ തക്കതായ ശിക്ഷാവിധികള്‍ കല്‍പ്പിച്ചു നടപ്പാക്കുന്നു. ഈ ശിക്ഷകള്‍ക്കായി ഇരുപത്തെട്ടുതരം നരകങ്ങള്‍ ഉണ്ട്‌.
മറ്റൊരുവന്റെ സ്വത്തോ, ഭാര്യയേയോ കുട്ടികളേയോ മോഷ്ടിച്ചവന്‌ താമിശ്രമെന്ന നരകത്തിലാണ്‌ വാസം. മറ്റൊരുവനെ വഞ്ചിക്കുകയോ പരഭാര്യയെ അനുഭവിക്കുകയോ ചെയ്തവനെ അന്ധതാമിശ്രമെന്ന നരകത്തില്‍ തളളുന്നു. വഞ്ചകന്റെ ഹൃദയം പോലെ അവിടെ അന്ധതയും ഇരുട്ടുമത്രെ.
സ്വന്തം ഭാര്യയോടും കുട്ടികളോടുമുളള അമിതമായ സ്നേഹത്താല്‍ മറ്റുളളവരെ വെറുപ്പിച്ചും വഞ്ചിച്ചും കുടുംബത്തെ പോറ്റുന്നവന്‌ രൗരവം എന്ന നരകം. അവിടെ പാമ്പുകളേക്കാള്‍ ഭയാനകമായ ജീവികള്‍ അവനെ പീഢിപ്പിക്കുന്നു. മഹാരൗരവം എന്ന നരകത്തില്‍ നരഭോജികളായ ക്രവ്യാദങ്ങളുണ്ട്‌. സ്വാര്‍ത്ഥതയോടെ സ്വന്തം ശരീരത്തിന്‌ വേണ്ടി മാത്രം ജീവിച്ചവര്‍ക്കുളള നരകമാണിത്‌. പക്ഷികളേയും മൃഗങ്ങളേയും ജീവനോടെ ചുട്ടുകൊന്നവരെ കുംഭീപാകം എന്ന നരകത്തില്‍ യമഭടന്മ‍ാര്‍ എണ്ണയില്‍ വറുക്കുന്നു. അഛനേയോ മഹാത്മാക്കളേയോ ധിക്കരിച്ച്‌ വെറുത്തു ജീവിച്ചവരെ കാലസൂത്രം എന്ന നരകത്തില്‍ ചുട്ടുപഴുത്ത ചെമ്പുതകിടില്‍ യമഭടന്മ‍ാര്‍ കിടത്തുന്നു.
സ്വധര്‍മ്മങ്ങളേയും ആചാരങ്ങളേയും ധിക്കരിച്ച്‌ പരധര്‍മ്മം സ്വീകരിക്കുന്നവരെ അസിപത്രവനം എന്ന നരകത്തില്‍ തളളുന്നു. ഇവിടുത്തെ മരങ്ങളില്‍ നിന്നുവീഴുന്ന ഇലകള്‍ മൂര്‍ച്ചയുളള വാളുകളത്രേ. അവിടെ ഓടിരക്ഷപ്പെടാന്‍ നോക്കുന്നവരെ യമഭടന്മ‍ാര്‍ ചാട്ടവാറുകൊണ്ടടിക്കുന്നു. നിരപരാധികളെ പീഢിപ്പിക്കുകയോ ശിക്ഷിക്കുകയോ ചെയ്ത ഉദ്യോഗസ്ഥന്മ‍ാരേയും രാജാക്കന്മ‍ാരേയും സൂകരമുഖം എന്ന നരകത്തില്‍ കൊണ്ടുപോയി ശക്തിയേറിയ കരങ്ങളാല്‍ അവരുടെ കൈകാലുകള്‍ ഞെരിച്ചുടയ്ക്കുന്നു.
അറിഞ്ഞുകൊണ്ട്‌ മറ്റുളളവരില്‍ വേദനയുണ്ടാക്കുന്നവനെ അനധകൂപമെന്ന നരകത്തില്‍ തളളുന്നു. അവിടെ അവനാല്‍ പീഢിപ്പിക്കപ്പെട്ടവര്‍ അവന് നിരന്തര പീഢനങ്ങള്‍ നല്‍കുന്നു. അവനെ ഉറങ്ങാനോ വിശ്രമിക്കാനോ അനുവദിക്കില്ല. ഏതൊരുവന്‍ തനിക്കു കിട്ടുന്നതൊക്കെ മറ്റുളളവര്‍ക്ക്‌ കൊടുക്കാതെ അനുഭവിക്കുന്നുവോ അവന് ഏറ്റവും കഠിനമായ ക്രിമിഭോജനനരകത്തില്‍ പതിക്കുന്നു. അവിടെ ക്രിമികീടങ്ങള്‍ അവനെ തിന്നുന്നു. മഹാത്മാക്കളെ കൊളളയടിക്കുന്നവന്‌ (അത്യാവശ്യ സന്ദര്‍ഭമൊഴിച്ച്‌) സന്താംശം എന്ന നരകത്തില്‍ ചുട്ടുപഴുത്ത ലോഹഗോളങ്ങളാല്‍ ശിക്ഷ ലഭിക്കുന്നു. അവിഹിതലൈംഗികവേഴ്ച്ചയില്‍ ഏര്‍പ്പെട്ട സ്ത്രീക്കും പുരുഷനും ചുട്ടുപഴുത്ത ലോഹബിംബത്തെ പുല്‍കുവാനിടവരുത്തുന്നു. താപസൂര്‍മി എന്ന നരകത്തില്‍ കമിതാവിന്റെ ലോഹബിംബം തയ്യാരായിരിപ്പുണ്ട്‌. വിവേകരഹിതമായ ലൈംഗികബന്ധങ്ങളിലേര്‍പ്പെട്ടവരെ കാത്ത്‌ വജ്രകണ്ഡകഷാല്‍മലി എന്ന നരകത്തില്‍ നിറയെ മുളളുകളുളള പട്ടുപഞ്ഞിമരം തയ്യാറായിരിപ്പുണ്ട്‌.
*************
നരകസ്ഥിതികളെകുറിച്ചുള്ള വര്‍ണ്ണന – ഭാഗവതം (130)
ഏവം വിധാ നരകാ യമാലയേ സന്തി ശതശഃ സഹസ്രശസ്തേഷു
സര്‍വ്വേഷു ച സര്‍വ്വ ഏവാധര്‍മ്മവര്‍ത്തിനോ യേ കേചിദിഹോദിതാ
അനുദിതാശ്ചാവനിപതേ പര്യായേണ വിശന്തി തഥൈവ ധര്‍മ്മാനുവര്‍ത്തിന
ഇതരത്ര ഇഹ തു പുനര്‍ഭവേ ത ഉഭയശേഷാഭ്യാം നിവിശന്തി (5-26-37)
ശുകമുനി തുടര്‍ന്നുഃ
ധര്‍മ്മാതിര്‍ത്തികള്‍ ലംഘിച്ചു ജീവിച്ച ഭരണാധികാരികള്‍ വൈതരിണി എന്ന നദിയില്‍ വൃത്തികെട്ട മാലിന്യങ്ങളുടെ കൂടെ കഴിയാനിടയാവുന്നു. അവിടെ അവരെ ജലജന്തുക്കള്‍ പീഢിപ്പിക്കുന്നു. വേശ്യകളോടൊപ്പം താമസിച്ച്‌ അധാര്‍മ്മീകമായി ജീവിച്ചവരെ പുയോദമെന്ന നരകത്തില്‍ തളളുന്നു.
പ്രാണനിരോധം എന്ന നരകത്തില്‍ യമഭടന്മ‍ാര്‍ മൃഗങ്ങളെ നായാടിക്കൊന്ന ബ്രാഹ്മണരേയും മറ്റുളളവരേയും കുന്തമുനയാല്‍ കോര്‍ത്തെടുക്കുന്നു. വിഷസം എന്ന നരകത്തില്‍ യാഗബലിക്ക്‌ മൃഗങ്ങളെ കൊന്നവരെ യമഭടന്മ‍ാര്‍ കൊത്തി നുറുക്കുന്നു. ലാലാഭക്ഷം എന്ന നരകത്തില്‍ സ്വന്തം ഭാര്യയെ തന്റെ രേതസ്സ്‌ കുടിക്കാന്‍ നിര്‍ബ്ബന്ധിച്ചവനെ ശുക്ലം നിറഞ്ഞ നദിയില്‍ തളളുന്നു. ഗ്രാമങ്ങളേയും വഴിയാത്രക്കാരേയും കൊളളയടിച്ചവരെ സാരമേയദാനം എന്ന നരകത്തില്‍ തളളുന്നു. അവിടെ കൂര്‍ത്തുമൂര്‍ത്ത പല്ലുകളുമായി നായ്ക്കള്‍ അവരെ കടിച്ചു കീറുന്നു. അവീചിമാതം എന്ന നരകത്തില്‍ കളളസാക്ഷി പറഞ്ഞവനേയും മറ്റുളളവരെ വ്യാപാരത്തില്‍ ചതിച്ചവരേയും ഒരു മലമുകളില്‍നിന്നു്‌ താഴോട്ട്‌ തളളിയിട്ട്‌ അവരുടെ ശരീരം ചിന്നിചിതറാനിടയാക്കുന്നു.
ഏതൊരുവന്‍ ബ്രാഹ്മണനാണെങ്കിലും അല്ലെങ്കിലും വ്രതാനുഷ്ഠാന സമയത്ത്‌ മദ്യപിക്കുന്നുവോ അവന് യപനം എന്ന നരകത്തില്‍ ഉരുകിയ ഇരുമ്പുലായനി കുടിക്കേണ്ടിവരുന്നു. സോമരസം കുടിക്കുന്ന ഭരണാധികാരികള്‍ക്കും വ്യാപാരികള്‍ക്കും ഇതുതന്നെ ഗതി. മുതിര്‍ന്നവരേയും മഹാത്മാക്കളേയും ബഹുമാനിക്കാതെ ചത്തതിനോക്കുമേ ജീവച്ചിരിക്കിലും എന്ന മട്ടില്‍ കഴിഞ്ഞവര്‍ക്കുളളതാണ്‌ ക്ഷരകര്‍ദമം എന്ന നരകം. അവിടെ അവരെ തലകീഴായി വലിച്ചിഴക്കുന്നു.
ഭദ്രകാളിക്കും ഭൈരവനും വേണ്ടി നരബലി കൊടുത്തവരെ രക്ഷോഗണഭോജന എന്ന നരകത്തില്‍ യമഭടന്മ‍ാര്‍ കൊത്തി നുറുക്കുന്നു. അവരാല്‍ കൊല്ലപ്പെട്ടവര്‍ അവരുടെ രക്തം കുടിക്കുന്നു. എന്നിട്ട്‌ തങ്ങളെ പീഢിപ്പിച്ചവര്‍ ഭൂമിയില്‍ ചെയ്ത പോലെ നൃത്തം ചെയ്യുന്നു. മൃഗങ്ങള്‍ക്കും പ്രാണികള്‍ക്കും ചൂണ്ടയില്‍ ഇരകാണിച്ച്‌ വിളിച്ച്‌ കൊല്ലുന്നവര്‍ക്കും മൃഗങ്ങളെ പീഢിപ്പിച്ചവര്‍ക്കും ശൂലപ്രോതം എന്ന നരകത്തില്‍ യമഭടന്മ‍ാര്‍ ശൂലംകൊണ്ട്‌ ശിക്ഷയേകുന്നു. ക്രുദ്ധസര്‍പ്പങ്ങളെപ്പോലെ ജീവിച്ച്‌ മറ്റുളളവരെ പീഢിപ്പിക്കുന്നതില്‍ ആനന്ദം കണ്ടെത്തിയവരെ ദണ്ഡസൂകം എന്ന നരകത്തില്‍ സര്‍പ്പങ്ങള്‍ ആഹരിക്കുന്നു. അവാതനിരോധനം എന്ന നരകം, ഭൂമിയില്‍ മറ്റുളളവരെ ഇരുട്ടറകളിലടച്ച്‌ ദ്രോഹിച്ചവര്‍ക്കുളളതാണ്‌. ഇരുളടഞ്ഞ ഗുഹകളും പാമ്പുകളും പുകയും നിറഞ്ഞയിടങ്ങളും അവര്‍ക്ക്‌ ശിക്ഷയേകുന്നു. മറ്റുളളവരേയും അപരിചിതരേയും ക്രുദ്ധമായി നോക്കുന്നവന്റെ കണ്ണുകള്‍ കാക്കകളും കഴുകന്മ‍ാരും കൊത്തിയെടുക്കുന്നു. മറ്റുളളവരെ അവിശ്വസിച്ച‍്‌ സ്വാര്‍ത്ഥപരമായി ധനമാര്‍ജ്ജിച്ചവന്റെ ദേഹം മുഴുവനും സൂചിമുഖം എന്ന നരകത്തില്‍ തുന്നികൂട്ടുന്നു.
ഇങ്ങനെ പാപികള്‍ ചെല്ലുന്ന അനേകായിരം നരകങ്ങളുണ്ട്‌. പുണ്യവാന്മ‍ാര്‍ സ്വര്‍ഗ്ഗലോകങ്ങളിലേക്കു പോവുമെങ്കിലും ബാക്കിയുളള കര്‍മ്മഫലത്തിനാല്‍ അവര്‍ ഇഹലോകജീവിതത്തില്‍ പുനര്‍ജ്ജനിക്കാനിടയാവുന്നു. സന്യാസത്തിലേക്കുളള രണ്ടു മാര്‍ഗ്ഗങ്ങളും ഭഗവാന്റെ സ്ഥൂലരൂപവര്‍ണ്ണനയും പതിന്നാലുലോകങ്ങളും ഞാന്‍ വിവരിച്ചു കഴിഞ്ഞു. ഏതൊരുവന്‍ ഈ വിവരണം കേള്‍ക്കുന്നുവോ അവന് ഹൃദയവും മനസും നിര്‍മ്മലമായി പരമപദം പ്രാപിക്കുന്നു.
കടപ്പാട് : ശ്രീമദ് ഭാഗവതം നിത്യപാരായണം
No comments:
Post a Comment