ഇന്ന് റാണാ പ്രതാപ് ജയന്തി .

"സാമ്രാജ്യങ്ങളും സിംഹാസനങ്ങളും പോയ്മറഞ്ഞേക്കാം , പക്ഷേ ധാർമികത നിലനിൽക്കുക തന്നെ ചെയ്യും"

മേവാറിന്‍റെ രജപുത്ര സിംഹം റാണാപ്രതാപനെപ്പറ്റി അജ്മീർ ഗവർണർ മിർസ അബ്ദുൾ റഹിം ഖാൻ പറഞ്ഞതാണിത് . റാണാ പ്രതാപനെ ആക്രമിക്കാനെത്തിയ മിർസ ഖാനെ പ്രതാപസിംഹന്‍റെ മകൻ അമർ സിംഗ് തോൽപ്പിച്ചോടിച്ചു. സ്വന്തം കുടുംബത്തെ ശത്രുവിന്‍റെ കയ്യിൽ അകപ്പെടാൻ വിട്ടിട്ടാണ് മിർസ രക്ഷപ്പെട്ടത് .

വിവരമറിഞ്ഞ റാണാപ്രതാപൻ എല്ലാ രാജകീയ ആഡംബരങ്ങളോടും കൂടി മിർസയുടെ ഭാര്യയേയും മക്കളേയും തിരിച്ചെത്തിക്കുകയാണുണ്ടായത് . അത്ഭുതപ്പെട്ട മിർസ ഖാന് പിന്നീടൊരിക്കലും റാണാപ്രതാപനെ ആക്രമിക്കാൻ കഴിഞ്ഞില്ല . ഒടുവിൽ അക്ബർ ഈ ഗവർണറെ മാറ്റുകയാണുണ്ടായത്.

റാണാ പ്രതാപ സിംഹന് വേണമെങ്കിൽ രാജകീയ സുഖങ്ങളെല്ലാം അനുഭവിച്ചു കൊണ്ട് കൊട്ടാരത്തിൽ തന്നെ കഴിയാമായിരുന്നു . അദ്ദേഹത്തിന്‍റെ കാലഘട്ടത്തിലെ മിക്ക രാജാക്കന്മാരും അക്ബറുടെ മുന്നിൽ കീഴടങ്ങി മുഗൾ ചക്രവർത്തിയുടെ സാമന്തനായി കഴിയുകയുമായിരുന്നു . എന്നാൽ റാണ തെരഞ്ഞെടുത്തത് സ്വാതന്ത്ര്യത്തിന്‍റെ വഴിയായിരുന്നു . മുഗൾ അധിനിവേശം മേവാറിന്‍റെ മണ്ണിൽ അനുവദിക്കില്ലെന്ന് അദ്ദേഹം പ്രതിജ്ഞ ചെയ്തു .

ചിത്തോറിനെ സ്വതന്ത്രമാക്കുന്നത് വരെ രാജകീയമായ ഒരു ആഡംബരവും ഉപയോഗിക്കില്ലെന്നും രാജ ഗൃഹങ്ങളിൽ അന്തിയുറങ്ങില്ലെന്നും അദ്ദേഹം പ്രതിജ്ഞ ചെയ്തതായി പറയപ്പെടുന്നു . വെറും ഇരുപതിനായിരം വരുന്ന സൈന്യത്തെ നയിച്ചാണ് രണ്ടു ലക്ഷം വരുന്ന അക്ബറുടെ സൈന്യത്തെ പ്രസിദ്ധമായ ഹൽദിഘാട്ട് യുദ്ധത്തിൽ അദ്ദേഹം തടഞ്ഞു നിർത്തിയത് . അക്ബറുടെ സൈന്യത്തെ തോൽപ്പിച്ചോടിക്കാൻ കഴിഞ്ഞില്ലെങ്കിലും തന്‍റെ രാജ്യം ശത്രുവിന് കീഴടങ്ങാതെ സംരക്ഷിക്കാൻ റാണയ്ക്ക് കഴിഞ്ഞു . റാണയുടെ വിശ്വസ്തനായ കുതിര ചേതക് മരിക്കുന്നത് ഈ യുദ്ധത്തിൽ വച്ചാണ് .

ആധുനിക യുദ്ധതന്ത്രങ്ങളുടെ രാജകുമാരനായിരുന്നു റാണാപ്രതാപ് . തന്‍റെ ചെറു സൈന്യത്തിന് മുഗളരുടെ വമ്പിച്ച സൈന്യത്തെ എതിരിട്ട് തോൽപ്പിക്കാനുള്ള കെല്‍പ്പ് ഇല്ലെന്ന് റാണയ്ക്കറിയാമായിരുന്നു . പിൻ വാങ്ങേണ്ടിടത്ത് പിൻവാങ്ങിയും അവസരം വരുമ്പോൾ കയറി ആക്രമിച്ചും അദ്ദേഹം ജീവിതാന്ത്യം വരെ സ്വതന്ത്രനായി ജീവിച്ചു .

അക്ബറിന്‍റെ പേരുകേട്ട സൈന്യത്തിന് ഒരിക്കലും റാണാപ്രതാപനെ പിടിക്കാൻ കഴിഞ്ഞില്ല . ഓരോ പ്രാവശ്യവും മേവാറിന്‍റെ ചില സ്ഥലങ്ങൾ പിടിച്ചടക്കി ഭരണാധികാരികളെ അവരോധിച്ചതിനു ശേഷം അക്ബറുടെ സേന തിരിച്ചു പോവുകയും റാണാപ്രതാപൻ ആ സ്ഥലങ്ങളെല്ലാം കൈവശപ്പെടുത്തുകയും ചെയ്യും . സാമ ദാന ഭേദ ദണ്ഡങ്ങളെല്ലാം പ്രയോഗിച്ചെങ്കിലും അക്ബറിന് ഈ രജപുത്ര ധീരനെ തന്‍റെ കാൽക്കീഴിൽ കൊണ്ടുവരാനായില്ല

നായാട്ടിനിടയിൽ സംഭവിച്ച ഒരു അപകടം മൂലമാണ് 1597 ജനുവരി 19 ന് അദ്ദേഹം മരിക്കുന്നത് . . അദ്ദേഹത്തിന്‍റെ മരണ വാർത്ത മുഗൾ ദർബാറിലെത്തിയപ്പോൾ അവിടെ സന്നിഹിതനായിരുന്ന ഒരു രജപുത്ര കവി ഇങ്ങനെ പാടി .

"ഓ റാണാ പ്രതാപ് , നിങ്ങളുടെ തല ആരുടെ മുന്നിലും കുനിഞ്ഞില്ല , നിങ്ങളുടെ പ്രശസ്തിക്ക് ഒരിക്കലും മങ്ങലേറ്റില്ല , അതികഠിനമായ യാതനകൾ സഹിച്ച് ശക്തരായ എതിരാളികളോട് താങ്കൾ പോരാടി, നിങ്ങളൊരിക്കലും മുഗൾ ദർബാറിൽ വന്ന് പ്രണാമം ചെയ്തില്ല . നിങ്ങൾ ഈ ലോകത്തിൽ വലിയൊരു സ്ഥാനമാണ് നേടിയിരിക്കുന്നത് . താങ്കളുടെ മരണവാർത്ത കേട്ടപ്പോൾ അക്ബറുടെ കണ്ണുകൾ മങ്ങിപ്പോയി , അദ്ദേഹത്തിന്‍റെ നാവ് കണ്ഠത്തിൽ നിന്നും പുറത്ത് വരാതെ വിഷമിച്ചു . അതെ റാണ ..... ഒടുവിൽ നിങ്ങൾ തന്നെയാണ് വിജയിച്ചിരിക്കുന്നത് !"

തീർത്തും സ്വതന്ത്രനായി ആരുടെയും അടിമയല്ലാതെ മരിക്കുന്നതിനുള്ള ഭാഗ്യം അക്കാലത്ത് വളരെ കുറച്ചു രാജാക്കന്മാർക്ക് മാത്രമാണ് ലഭിച്ചിരുന്നത് .അതിലൊരാളായിരുന്നു മേവാറിന്‍റെ റാണാ പ്രതാപ് സിംഹൻ . സ്വാതന്ത്ര്യത്തിന്‍റെ പര്യായമെന്നായിരുന്നു പ്രതാപസിംഹന് ചരിത്രകാരന്മാർ നൽകിയ വിശേഷണം .