ഹരിപ്പാട്ട് തൃക്കാര്‍ത്തിക മഹോത്സവം നാളെ (12..12..16)

ഹരിപ്പാട് സുബ്രഹ്മണ്യസ്വാമിക്ഷേത്രത്തിന്റെ ഉദ്ഭവവുമായി ബന്ധപ്പെട്ട് നിലനിൽക്കുന്ന ഒരു ഐതീഹ്യം അനുസരിച്ച് പണ്ട് ഈ  സ്ഥലത്തിന്റെ പേര് ''ഏകചക്ര'' എന്നായിരുന്നുവെന്നു പറയപ്പെടുന്നു. അന്നത്തേ ഗ്രാമത്തലവന്മാരുടെ  നേതൃത്വത്തില്‍ േവശില്പിയായ  വിശ്വകർമ്മാവ്പോലും അമ്പരന്നുപോകും വിധം മനോഹരമായ, പഞ്ചപ്രാകാരങ്ങളോടുകൂടിയ ഒരു മഹാക്ഷേത്രം പണിതു.

അങ്ങനെയിരിയ്ക്കെ ഒരുദിവസം  ഗ്രമത്തലവന്മാർക്കെല്ലാം  എകകാലത്ത് സ്വപ്നദർശനമുണ്ടായി. അവർ നിർമ്മിച്ച മഹാക്ഷേത്രത്തിൽ പ്രതിഷ്ഠിയ്ക്കാൻ ഏറ്റവും അനുയോജ്യമായ ഒരു വിഗ്രഹം കായംകുളം കായലിൽ ജലാധിവാസത്തിൽ കിടപ്പുണ്ടെന്നും പരശുരാമൻ പൂജചെയ്ത ചതുർബാഹു സുബ്രഹ്മണ്യവിഗ്രഹമാണ് അതെന്നും  അടയാളമായി വിഗ്രഹം കിടക്കുന്ന സ്ഥലത്ത് നീർച്ചുഴിയും പൂജാപുഷ്പങ്ങളും പ്രത്യക്ഷപ്പെടുമെന്നും അവിടെ ഇറങ്ങിത്തപ്പിയാൽ വിഗ്രഹം കിട്ടുമെന്നും ആയിരുന്നു ആ ദർശനം. തുടർന്ന് എല്ലാവരും നാട്ടുകാരോടും കൂടി ജലമാർഗ്ഗം അത്യുത്സാഹത്തോടെ  കായംകുളത്തെത്തി. അവിടെ കായംകുളംകായലിൽ ഗോവിന്ദമുട്ടം എന്ന ഭാഗത്ത് നീർച്ചുഴിയും പൂജാപുഷ്പങ്ങളും കണ്ട സ്ഥലത്തുനിന്നും വിഗ്രഹം കണ്ടെടുത്തു. വിഗ്രഹം കണ്ട ആ സ്ഥലം ''കണ്ടനല്ലൂര് '' ''കണ്ടല്ലൂർ '' എന്നറിയപ്പെടുന്നു .  തുടർന്ന് ആ ദിവ്യ വിഗ്രഹവുമായി വടക്കോട്ടുതിരിച്ച് ജലമാർഗ്ഗം പായിപ്പാട്ടാറ്റിലൂടെ നിരവധി വള്ളങ്ങളുടെ അകമ്പടിയോടെ ഘോഷയാത്രയായി വിഗ്രഹം നെൽപ്പുരക്കടവിൽ എത്തിച്ചു. ഈ സംഭവത്തിന്റെ ഓർമ്മയ്ക്കായി ഇന്നും ചിങ്ങമാസത്തിലെ ചതയം നാളിൽ പായിപ്പാട്ടാറ്റിൽ വിഗ്രഹലബ്ധി സ്മാരക വള്ളംകളി നടത്തിവരുന്നു. തുടർന്ന് പുതിയ ക്ഷേത്രത്തിലേയ്ക്ക് കൊണ്ടുപോയ വിഗ്രഹം കലിവർഷം 2874 വൃശ്ചികമാസം 11 ആം തീയതി തൃക്കാര്‍ത്തിക ദിവസം സകലവിധ താന്ത്രികച്ചടങ്ങുകളോടെയും ഏകചക്രേശനായി പ്രതിഷ്ഠിച്ചു.ആ സമയത്ത് ഒരു ദിവ്യൻ അവിടെ പ്രത്യക്ഷപ്പെട്ടുവെന്നും അദ്ദേഹം ജീവകലശാഭിഷേകം നടത്തിയെന്നും ആ ദിവ്യൻ സാക്ഷാൽ പരശുരാമൻ (ശ്രീഹരി) തന്നെയായിരുന്നുവെന്നും പറയപ്പെടുന്നു. അങ്ങനെ, ശ്രീഹരിയുടെ പാദം പതിഞ്ഞസ്ഥലം 'ഹരിപ്പാദപുരം' എന്നും കാലാന്തരത്തിൽ 'ഹരിപ്പാട്' എന്നും അറിയപ്പെടാൻ തുടങ്ങി.

വൃശ്ചികമാസത്തിൽ കാർത്തിക നക്ഷത്രവുംപൗർണ്ണമിയും
കൂടിയ ദിവസം നട്ടുച്ചയ്ക്കായിരുന്നു പ്രതിഷ്ഠ. അതിനാൽ ഇന്നും വൃശ്ചികമാസത്തേ തൃക്കാർത്തി ദിവസം ക്ഷേത്രത്തിൽ വളരെ പ്രധാനമാണ്. 18 പൂജയും കളഭവും വലിയ മയിൽവാഹനത്തിൽ എഴുന്നള്ളത്തും സ്വർണ്ണകുംഭത്തിൽ കാണിക്കയും വിളക്കെഴുന്നള്ളത്തും പ്രധാനം.നാടും നഗരവും അന്നേദിവസം കാര്‍ത്തിക ദീപങ്ങളാല്‍ അലങ്കൃതമായിരിക്കും..

കേരളത്തിലെ ഏറ്റവും വലിയ സുബ്രഹ്മണ്യസ്വാമിക്ഷേത്രമാണ് തെക്കൻപളനി എന്ന് പകഴ്പെറ്റ ഹരിപ്പാട് മഹാക്ഷേത്രം. വലുപ്പം കൊണ്ടും, പ്രശസ്തി കൊണ്ടും, ഐതിഹ്യപ്പെരുമകൊണ്ടും, ആചാരാനുഷ്ഠാനങ്ങൾ കൊണ്ടുമെല്ലാം ഹരിപ്പാട് ഈ സ്ഥാനത്ത് വരുന്നു. അഞ്ച് ഏക്കർ വരുന്ന വിശാലമായ മതിലകത്തിനത്തിനുപുറമേ ചെമ്പുമേഞ്ഞ വലിയ വട്ടശ്രീകോവിൽ, വലിയ രണ്ട് ആനക്കൊട്ടിൽ, മൂന്നുഭാഗത്തുമുള്ള ഗോപുരങ്ങൾ, വടക്കുവശത്ത് രണ്ട് കവാടങ്ങൾ ,നാലമ്പലം, വിളക്കുമാടം, കൂത്തമ്പലം, ഭഗവദ് വാഹനമായ മയിലിനെ ശിരസ്സിലേറ്റുന്ന കേരളത്തിലെ ഏറ്റവും വലിയ (28 കോൽ 18 അംഗുലം ഉയരം -30 സ്വർണ്ണപ്പറകൾ) സ്വർണ്ണക്കൊടിമരങ്ങളിലൊന്ന്, വലിയ രണ്ട് കുളങ്ങൾ (ഒരുകുളം 5 ഏക്കർ വിസ്തൃതിവരുന്ന പെരുംകുളം) ഇവയെല്ലാം ഈ ക്ഷേത്രത്തിന്റെ മനോഹരമായ നിർമ്മിതിയുടെ ഉത്തമോദാഹരണങ്ങളാണ്.

പ്രതിഷ്ഠാവിഗ്രഹത്തിന്റെ വലുപ്പത്തിന്റെ കാര്യത്തിലും ഹരിപ്പാട് തന്നെയാണ് കേരളത്തിലെ സുബ്രഹ്മണ്യസ്വാമിക്ഷേത്രങ്ങളിൽ മുമ്പിൽ. ആറടിയ്ക്കുമുകളിൽ ഉയരമുള്ള മനോഹരമായ കൃഷ്ണശിലാ നിർമ്മിതമായ ചതുർബാഹു വിഗ്രഹത്തിൽ കിഴക്കോട്ട് ദർശനമായാണ്  സുബ്രഹ്മണ്യസ്വാമി വാഴുന്നത്.

ക്ഷേത്രത്തിൽ ഉപദേവതകളായി ദക്ഷിണാമൂർത്തി,മഹാഗണപതി, ഗണപതി, ധർമ്മശാസ്താവ്,ഗോശാലകൃഷ്ണൻ (തിരുവമ്പാടി കൃഷ്ണൻ), നാഗദൈവങ്ങൾ, ഗുരുതികാമൻ-പഞ്ചമി,യക്ഷിയമ്മ എന്നിവർ പ്രതിഷ്ഠിയ്ക്കപ്പെട്ടിരിയ്ക്കുന്നു. ശ്രീകോവിലിലെ തെക്കേ ത്വരത്തിനുള്ളിലാണ് ദക്ഷിണാമൂർത്തി,മഹ ഗണപതി പ്രതിഷ്ഠകൾ. നാലമ്പലത്തിനുപുറത്ത് കിഴക്കുഭാഗത്ത്  ഗണേശനും തെക്കുഭാഗത്ത്  ധർമ്മശാസ്താവും,  തെക്കുകിഴക്ക് ഗോശാലകൃഷ്ണനും വടക്കുകിഴക്കായി ഗുരുതികാമനും പഞ്ചമിയും, മതിൽക്കെട്ടിന് പുറത്ത്  മൂലക്ഷേത്രത്തിന് സമീപമായി നാഗദൈവങ്ങളും കുടികൊള്ളുന്നു . കൂത്തമ്പലത്തിലാണ് യക്ഷിയമ്മ കുടികൊള്ളുന്നത്.