ഒരിക്കല്‍ ശ്രീകൃഷ്ണന്‍ ബലരാമാദികളോടൊത്ത് ദ്വാരകാപുരിയില്‍ വാഴുന്നകാലത്ത്
ഒരുദിവസം അര്‍ജ്ജുനന്‍ ഭഗവാനെ കാണാനായി അവിടെയെത്തുന്നു. സല്‍ക്കാരാദികള്‍ക്കുശേഷം, തന്റെയൊപ്പം കുറച്ചുദിവസം കൊട്ടാരത്തില്‍ താമസിക്കാന്‍ കൃഷ്ണന്‍ അര്‍ജ്ജുനനോട് ആവശ്യപ്പെട്ടു.
🌟അര്‍ജ്ജുനന്‍ അപ്രകാരം കൊട്ടാരത്തില്‍ അതിഥിയായി വസിക്കുന്ന ഒരുനാളില്‍ , ഒരു ബ്രാഹ്മണന് തന്റെ ഒന്‍പതാമത്തെ പിഞ്ചുകുഞ്ഞിന്റെ മൃതദേഹവും കൈയ്യിലേന്തി കൊട്ടാരത്തിലെത്തി വിലപിക്കുന്നതും ഭഗവാനെ ഭര്ത്സിക്കുന്നതും കാണുവാനിടയായി. കൃഷ്ണനും ബലരാമനും ഇതൊന്നും കണ്ട ഭാവം നടിക്കാതെ ഇരിക്കുന്നതുകണ്ട അര്‍ജ്ജുനന്‍ ബ്രാഹ്മണനോട് കാര്യങ്ങള്‍ ചോദിച്ചു മനസ്സിലാക്കുന്നു. തന്റെ ഒന്‍പതു പുത്രന്മാരും പ്രസവസമയത്ത് തന്നെ മരിച്ച്ചുപോകുകയും, ഓരോ തവണയും മൃതദേഹവുമായി ഭഗവാന്റെ അടുത്തെത്തി സങ്കടങ്ങള്‍ ബോധിപ്പിച്ചിട്ടും അദ്ദേഹം കനിഞ്ഞില്ലെന്നും മറ്റും ബ്രാഹ്മണന് അര്‍ജ്ജുനനോട് പറഞ്ഞു. ബ്രാഹ്മണന് വിഷമിക്കേണ്ടയെന്നും പത്താമത് ഒരു പുത്രന്‍ ജനിച്ചാല്‍ ആ പുത്രനെ താന്‍ രക്ഷിക്കാമെന്നും, അതിനു സാധിച്ചില്ലെങ്കില്‍ അഗ്നിപ്രവേശം ചെയ്ത് ആത്മഹത്യ ചെയ്യുമെന്നും അര്‍ജ്ജുനന്‍ ബ്രാഹ്മണന് വാക്ക് നല്‍കി.
💎അര്‍ജ്ജുനന്റെ സത്യത്തില്‍ വിശ്വസിച്ച് ഉത്സാഹത്തോടെ തന്റെ ഗൃഹത്തില്‍ മടങ്ങിയെത്തുന്ന ബ്രാഹ്മണന് നടന്ന സംഭവങ്ങളെല്ലാം പത്നിയെ അറിയിക്കുന്നു. അനന്തരം പ്രാര്‍ത്ഥനതല്പരരായി വസിക്കവെ ബ്രാഹ്മണപത്നി വീണ്ടും ഗര്‍ഭം ധരിച്ചു. പ്രസവനാള് അടുത്തു എന്ന് പത്നി ബ്രാഹ്മണനെ അറിയിച്ചപ്പോള്‍ , അര്‍ജ്ജുനനെ കൂട്ടിക്കൊണ്ടുവരുവാനായി ബ്രാഹ്മണന് പുറപ്പെടുന്നു. അതിന്‍പ്രകാരം ബ്രാഹ്മണഗൃഹത്തിലെത്തുന്ന അര്‍ജ്ജുനന്‍ സൂതികാലയമായി ഒരു ശരകൂടം നിര്‍മ്മിച്ചു നല്‍കി അതിന് കാവല്‍ നില്‍ക്കുകയുമുണ്ടായി. ബ്രാഹ്മണപത്നി ഒരു ഉണ്ണിയെ പ്രസവിച്ചു എങ്കിലും പത്താമനായ ആ ഉണ്ണിയുടെ മൃതദേഹം പോലും അപ്രത്യക്ഷമായി. പത്താമത്തെ പുത്രന്റെ മൃതദേഹംപോലും കാണാനാവാതെ വന്ന ബ്രാഹ്മണന് കോപാന്ധനായി അര്‍ജ്ജുനനെ ഭര്ത്സിച്ചു.നിരാശയോടെ അവിടെനിന്നു മടങ്ങിയ അര്‍ജ്ജുനന്‍ സ്വര്‍ഗ്ഗത്തിലും പാതാളത്തിലും മറ്റു ലോകങ്ങളിലും കുട്ടിയെ തെരഞ്ഞിട്ടു കാണാതെ വന്നപ്പോള്‍ ദ്വാരകയില്‍ മടങ്ങിയെത്തി അഗ്നിപ്രവേശത്തിനൊരുങ്ങിയപ്പോള്‍, കൃഷ്ണന്‍ തടഞ്ഞുകൊണ്ട്‌, കുട്ടികളെ കാണിച്ചുകൊടുക്കാമെന്ന് പറഞ്ഞു.
🏵കൃഷ്ണന്‍ അര്‍ജ്ജുനനെയും കൂട്ടി അനെകലോകങ്ങള്‍ കടന്നു ക്ഷീരസാഗരത്തിലെത്തിയപ്പോള്‍ , അനന്തശായിയായ സന്താനഗോപാലനേയും, ചുറ്റും ഓടിക്കളിക്കുന്ന ബ്രാഹ്മണ ശിശുക്കളെയും കണ്ടു. അര്‍ജ്ജുനന്റെ അഹംഭാവം ശമിപ്പിക്കുന്നതിനും നരനാരായണന്മാരെ ഒന്നിച്ചുകാണുന്നതിനുമായിട്ടാണ് ഇപ്രകാരമൊക്കെ ചെയ്തത് എന്ന് മഹാവിഷ്ണു പറഞ്ഞു. കുട്ടികളെ മടക്കിനല്കിയതിനൊപ്പം, സന്താനഗോപാല മൂര്‍ത്തിയായി ഒരു വിഗ്രഹവും അര്‍ജ്ജുനനു മഹാവിഷ്ണു നല്‍കി
യാത്രയയച്ചു.
🔶ഇപ്രകാരം അര്‍ജ്ജുനനു ലഭിച്ച വിഗ്രഹമാണ്‌ തുപ്പൂണിത്തുറ പൂര്‍ണ്ണത്രയീശ ക്ഷേത്രത്തിലെ പ്രതിഷ്ഠ.
കൊച്ചി രാജ വംശത്തിന്റെ ഭരദൈവമാണ് പൂര്‍ണത്രയീശന്‍. ഇന്ത്യയിലെ തന്നെ ഏറ്റവും വലിയ പഞ്ചലോഹ വിഗ്രഹമുള്ള ക്ഷേത്രമാണിത്. ഒരു വര്‍ഷം നാല് ഉത്സവങ്ങളാണ് ഈ ക്ഷേത്രത്തില്‍. ചിങ്ങത്തില്‍ നടക്കുന്ന മൂശാരി ഉത്സവം എട്ടു ദിവസം നീളും. തിരുവോണം ആറാട്ടോടെയാണു സമാപിക്കുക. തുലാം മാസത്തിലെ ഉത്സവം ക്ഷേത്രം കത്തിനശിച്ചതിന്റെ ഓര്‍മ പുതുക്കലുമായി ബന്ധപ്പെട്ടുള്ളതാണ്. തൃക്കേട്ട പുറപ്പാടായി വൃശ്ചികത്തില്‍ ഉത്സവം നടക്കും. കുംഭത്തിലെ പറയുത്സവമാണ് അവസാനത്തേത്.
💎പ്രാചീനകാലത്ത്, ക്ഷേത്രത്തിലേക്കു പുതിയ പഞ്ചലോഹവിഗ്രഹം നിര്‍മിക്കാന്‍ തീരുമാനിച്ചത്രെ. പണ്ടാരപ്പള്ളി മൂശാരിക്കായിരുന്നു നിര്‍മാണച്ചുമതല. വിഗ്രഹനിര്‍മാണത്തില്‍ വിദഗധനാണെങ്കിലും എത്ര ശ്രമിച്ചിട്ടും വിഗ്രഹം രൂപപ്പെടുത്തിയെടുക്കാന്‍ സാധിക്കാതെവന്നു. നിസ്സഹായനായ അദ്ദേഹം മൂശയ്ക്കു സമീപമിരുന്നു കരച്ചില്‍ തുടങ്ങി. പെട്ടെന്നു തന്നെ മൂശാരി അപ്രത്യക്ഷനായത്രെ. അദ്ദേഹം വിഗ്രഹത്തില്‍ ലയിച്ചുവെന്നാണു വിശ്വാസം. ഈ സംഭവത്തിന്റെ അനുസ്മരണാര്‍ഥമാണു മൂശാരി ഉത്സവം നടത്തുന്നത്.
🐘തൃക്കേട്ട പുറപ്പാടായി നടക്കുന്ന വൃശ്ചികോത്സവത്തിന്റെ പിന്നിലും രസകരമായ ചരിത്രമുണ്ട്. വില്വമംഗലം സ്വാമിയാര്‍ ഉത്സവത്തിനെത്തിയപ്പോള്‍ ഉണ്ണിക്കൃഷ്ണന്‍ ആനപ്പുറത്ത് ഓടിക്കളിക്കുന്നതു കണ്ടത്രെ.
ഇതാണു തൃക്കേട്ട പുറപ്പാടിന്റെ പ്രാധാന്യം. ആനയെഴുന്നള്ളിപ്പാണു പ്രധാന ആകര്‍ഷണീയത. 15 ആനകളെ അണിനിരത്തിയുള്ളതാണ് എഴുന്നള്ളത്ത്.
കുംഭത്തിലെ പറയെടുപ്പിന്റെ പിന്നിലുള്ള ഐതിഹ്യം, ഒരു ബ്രാഹ്മണ പെണ്‍കുട്ടിയുമായി ബന്ധപ്പെട്ടുള്ളതാണ്.
🌺നങ്ങ എന്ന പെണ്‍കുട്ടിയുടെ വീട് ക്ഷേത്രത്തിനു സമീപത്തായിരുന്നത്രെ. അവള്‍ എന്നും കുളിച്ചുതൊഴുമായിരുന്നു. അങ്ങനെയിരിക്കെ അവളുടെ വിവാഹം നിശ്ചയിക്കപ്പെട്ടു. അകലെയായിരുന്നു വരന്റെ വീട്. വിവാഹിതയായി ഭര്‍തൃഗൃഹത്തിലെത്തിയാല്‍ ക്ഷേത്രദര്‍ശനം മുടങ്ങുമല്ലോ എന്ന ചിന്ത അവളെ നിരാശപ്പെടുത്തി. നിസ്സഹായയായ അവള്‍ പൂര്‍ണത്രയീശനെ പ്രാര്‍ഥിച്ചുകൊണ്ടേയിരുന്നു. വിവാഹനാളില്‍ പെണ്‍കുട്ടി ക്ഷേത്രത്തില്‍ തൊഴാനെത്തിയപ്പോള്‍ ശ്രീകോവിലിനുള്ളില്‍നിന്നു നീണ്ടുവന്ന രണ്ടു കൈകള്‍ അവളെ അകത്തേക്കു കൂട്ടിക്കൊണ്ടുപോയി. അതോടെ നങ്ങ അപ്രത്യക്ഷയായി. ഭഗവാന്റെ പ്രീതിക്കു പാത്രമായി അവള്‍ ഭഗവാനില്‍ തന്നെ ലയിച്ചുവെന്നാണു വിശ്വാസം.
♦ശ്രീകോവിലില്‍ കിഴക്കോട്ട്‌ ദര്‍ശനമായി പൂര്‍ണത്രയീശന്‍. വേദങ്ങളുടെ ഈശന്‍ എന്ന മഹാവിഷ്ണു സങ്കല്‍പം. നാലടിയോളം വരുന്ന പഞ്ചലോഹ വിഗ്രഹം. ചതുര്‍ബാഹു വിഗ്രഹത്തില്‍ ഗദഹസ്തം. പീഠത്തിലൂന്നി എഴുന്നേറ്റിരിക്കുന്നപോലത്തെ ഭാവം. ഉപപ്രതിഷ്ഠകള്‍ക്ക്‌ ഇവിടെ പ്രാധാന്യമില്ല. ശ്രീകോവിലിന്‌ ചുറ്റും അവതാരക്കഥകള്‍. മൂന്നുതട്ടുള്ള കെടാവിളക്കുമുണ്ട്‌.🔥
✨അര്‍ജ്ജുനനാണ് വിഗ്രഹം തൃപ്പൂണിത്തുറയില്‍ പ്രതിഷ്ഠിച്ചതെന്നു ഐതിഹ്യം. പ്രതിഷ്ഠാ സമയത്ത്, സമീപത്തുനിന്നും പിഴുതെടുത്ത എള്ളുപിഴിഞ്ഞുണ്ടാക്കിയ എണ്ണകൊണ്ട്‌ വിളക്കുകത്തിക്കുകയും ചെയ്തു. എള്ളെണ്ണ ഇന്നും ഈ ക്ഷേത്രത്തിലെ വഴിപാടാണ്. ഇവിടെ പതിവായി അഞ്ചുപൂജയുണ്ട്‌. ദിവസവും എഴുന്നെള്ളത്തിന്‌ ആനയും ഉണ്ട്‌.
🏵പന്തിരുനാഴി വഴിപാടാണ് പ്രധാനം. ധനുമാസത്തിലെ ആദ്യത്തെ ബുധനാഴ്ച പ്രധാനപ്പെട്ടതാണ്‌. കുചേലന്‍ തന്റെ സതീര്‍ത്ഥ്യന്‌ അവല്‍ നല്‍കിയ ദിവസത്തെ അനുസ്മരിച്ചാണ്‌ ഇത്‌ ചെയ്യുന്നത്‌. കുംഭമാസത്തിലെ ഉത്രം നാളിലുള്ള അപ്പം വഴിപാട്‌ പ്രസിദ്ധമാണ്. ഉത്രം നാളിലെ ലക്ഷ്മി നാരായണവിളക്ക്‌ കണ്ട്‌ തൊഴുന്നതും ശ്രേയസ്കരമാണെന്ന്‌ വിശ്വാസം. അന്ന്‌ ഭഗവാന്റെ പിറന്നാളാഘോഷമാണ്‌.
No comments:
Post a Comment