ഓം നമഃ ശിവായ

ഓം നമഃ ശിവായ
"ക൪മ്മണ്യേവാധികാരസ്തേ മാ ഫലേഷു കദാചനഃ മാ ക൪മ്മഫലഹേതു൪ഭൂ൪മാതേ സംഗോസ്ത്വക൪മ്മണി" നിനക്ക് ക൪മ്മം ചെയ്യുവാന് മാത്രമേ അധികാരമുള്ളൂ. ക൪മ്മത്തിന്റെ ഫലത്തില് ഒരിക്കലും ആശിക്കരുത്. ക൪മ്മഫലത്തില് സംശയാലുവായ നിനക്ക് ക൪മ്മം ചെയ്യാതിരിക്കാനുള്ള മനസ്സും ഉണ്ടാവരുത്.

Wednesday, March 21, 2018

ഹിന്ദു അറിഞ്ഞിരിക്കേണ്ട പ്രാർത്ഥനാ ശ്ലോകങ്ങൾ



1. പ്രഭാത ശ്ലോകം

ഉണര്‍ന്നെണീക്കുമ്പോള്‍ ഇരുകൈകളും ചേര്‍ത്തുവച്ചു കൈകളെ നോക്കി

കരാഗ്രേ വസതേ ലക്ഷ്മീ
കരമദ്ധ്യേ സരസ്വതീ
കരമൂലേ തു ഗോവിന്ദാ
പ്രഭാതേ കരദര്‍ശനം

2. പ്രഭാത ഭൂമിശ്ലോകം

തറയെ തൊട്ടു ശിരസ്സില്‍ വെച്ചുകൊണ്ട്

സമുദ്ര വസനേ ദേവീ
പര്‍വതസ്തന മണ്ഡലേ
വിഷ്ണുപത്നീ നമസ്തുഭ്യം
പാദസ്പര്‍ശം ക്ഷമസ്വ മേ

3. സൂര്യോദയ ശ്ലോകം

ബ്രഹ്മസ്വരൂപമുദയേ
മധ്യാഹ്നേതു മഹേശ്വരം
സായം കാലേ സദാ വിഷ്ണു
ത്രിമൂര്‍തിശ്ച ദിവാകരഃ

4. സ്നാന ശ്ലോകം

ഗംഗേച യമുനേ ചൈവ
ഗോദാവരീ സരസ്വതീ
നര്‍മദേ സിന്ധു കാവേരീ
ജലേസ്മിന്‍ സന്നിധിം കുരു

5. ഭസ്മധാരണശ്ലോകം

ശ്രീകരം ച പവിത്രം ച
ശോക രോഗ നിവാരണം
ലോകേ വശീകരം പുംസാം
ഭസ്മം ത്ര്യൈലോക്യ പാവനം
ഓം അഗ്നിരിതി ഭസ്മ വായുരിതി ഭസ്മ
ജലമിതി ഭസ്മ സ്ഥലമിതി ഭസ്മ
വ്യോമേതി ഭസ്മ സര്‍വം ഹവാ ഇദം ഭസ്മ
മന ഏതാനി ചക്ഷുംഷിം ഭസ്മ
ത്രയംബകം യജാമഹേ
സുഗന്ധിം പുഷ്ടി വര്‍ദ്ധനം
ഉര്‍വാരുകമിവ ബന്ധനാത്
മൃത്യോര്‍മുക്ഷീയ മാമൃതാത്

6. തുളസീപ്രദക്ഷിണം ചെയ്യുമ്പോള്‍

3 തവണ

പ്രസീദ തുളസീ ദേവീ
പ്രസീദ ഹരിവല്ലഭേ
ക്ഷീരോദ മഥനോദ് ഭൂതേ
തുളസീ ത്വം നമാമ്യഹം

7. ആല്‍പ്രദക്ഷിണം ചെയ്യുമ്പോള്‍

7 തവണ

മൂലതോഃ ബ്രഹ്മരൂപായ
മദ്ധ്യതോഃ വിഷ്ണുരൂപിണേ
അഗ്രതഃ ശിവരൂപായ
വൃക്ഷരാജായ തേ നമഃ

8. കാര്യപ്രാരംഭശ്ലോകം

വക്രതുണ്ഡ മഹാകായ
സൂര്യകോടി സമപ്രഭ
നിര്‍വിഘ്നം കുരു മേ ദേവ
സര്‍വകാര്യേഷു സര്‍വദാ
ശുക്ലാം ഭരതരം വിഷ്ണും
ശശിവര്‍ണം ചതുര്‍ഭുജം
പ്രസന്ന വദനം ധ്യായേത്
സര്‍വ വിഘ്നോപ ശാന്തയേ

9. വിളക്കുകൊളുത്തുമ്പോള്‍

ദീപ ജ്യോതി പരബ്രഹ്മം
ദീപം സര്‍വ തമോപഹം
ദീപേന സാധ്യതേ സര്‍വം
സന്ധ്യാ ദീപം നമോസ്തുതേ
ശുഭംകരോതു കല്യാണം
ആയുരാരോഗ്യ വര്‍ദ്ധനം
സര്‍വ്വ ശത്രു വിനാശായ
സന്ധ്യാദീപം നമോനമഃ
ശുഭം കരോതി കല്യാണം
ആരോഗ്യം ധന സമ്പദഃ
ശത്രു ബുദ്ധി വിനാശായ
ദീപ ജ്യോതിര്‍ നമോ നമഃ
ദീപജ്യോതിര്‍ പരബ്രഹ്മ
ദീപജ്യോതിര്‍ ജനാര്‍ദ്ദനാ
ദീപോ മേ ഹരതു പാപം
ദീപ ജ്യോതിര്‍ നമോസ്തുതേ

10. മംഗള ആരതിശ്ലോകം

കര്‍പ്പൂര ഗൌരം കരുണാവതാരം
സംസാര സാരം ഭുജഗേന്ദ്ര ഹാരം
സദാ വസന്തം ഹൃദയാരവിന്തേ
ഭവം ഭവാനി സഹിതം നമാമി

മംഗളം ഭഗവാന്‍ വിഷ്ണു
മംഗളം ഗരുഡദ്വജ
മംഗളം പുണ്ഡരീകാക്ഷം
മംഗളായതനോ ഹരി

സര്‍വ മംഗള മാംഗല്യേ
ശിവേ സര്‍വാര്‍ത്ഥ സാധികേ
ശരണ്യേ ത്രയംബികേ ഗൌരീ
നാരായണീ നമോസ്തുതേ

നീരാജനം ദര്‍ശയാമി
ദേവ ദേവ നമോസ്തുതേ
പ്രസന്നോ വരദോ ഭൂയാഃ
വിശ്വ മംഗളകാരകാ

11. ചുറ്റുമ്പോള്‍

വലതു വശത്തു തുടങ്ങി പ്രദക്ഷിണ ദിശയില്‍ നിന്ന സ്ഥലത്തു തന്നെ മൂന്നു പ്രാവശ്യം ചുറ്റുമ്പോള്‍

യാനി കാനിച പാപാനി
ജന്മാന്തര കൃതാനിചാ
താനി താനി വിനശ്യന്തി
പ്രദക്ഷിണം പഠേ പഠേ
പ്രകൃഷ്ട പാപ നാശായ
പ്രകൃഷ്ട ഫല സിദ്ധയേ
പ്രദക്ഷിണം കരോമിത്യം
പ്രസീദ പുരുഷോത്തമാ/പരമേശ്വരീ
അന്യദാ ശരണം നാസ്തി
ത്വമേവ ശരണം മമ
തസ്മത് കാരുണ്യ ഭാവേന
രക്ഷ രക്ഷ പരമേശ്വരാ/ജനാര്‍ദ്ദനാ

12. പ്രാര്‍ത്ഥനയുടെ അവസാനം

കായേന വാചാ
മനസേന്ദ്രിയൈര്‍വാ
ബുദ്ധ്യാത്മനാവാ
പ്രകൃതേ സ്വഭാവാത്
കരോമിയദ്യത്
സകലം പരസ്മൈ
നാരായണാ
യേതി സമര്‍പയാമി

13. പഠിക്കുന്നതിനു മുന്‍

സരസ്വതീ നമസ്തുഭ്യം
വരദേ ജ്ഞാനരൂപിണീ
വിദ്യാരംഭം കരിഷ്യാമി
സിദ്ധിര്‍ഭവതു മേ സദാ

14. ഭോജനത്തിനു മുന്‍പ്

ഭക്ഷണം വിളമ്പിയ ഉടനേ
അന്നപൂര്‍ണേ സദാപൂര്‍ണേ
ശങ്കര പ്രാണവല്ലഭേ
ജ്ഞാന വൈരാഗ്യ സിധ്യര്‍ത്തം
ഭിക്ഷാം ദേഹി ച പാര്‍വതി
മാതാച പാര്‍വതീ ദേവീ
പിതാ ദേവോ മഹേശ്വരഹ
ബാന്ധവാഃ ശിവ ഭക്താശ്ച
സ്വദേശോ ഭുവനത്രയം

15. ഭക്ഷണ സമയം

ഹരിര്‍ദ്ദാതാ ഹരിര്‍ഭോക്താ
ഹരിരന്നം പ്രജാപതിഃ
ഹരിര്‍വിപ്രഃ ശരീരസ്തു
ഭൂങ്തേ ഭോജയതേ ഹരിഃ

16. ഭോജനാനന്തര ശ്ലോകം

അഗസ്ത്യം വൈനതേയം ച
ശമീം ച ബഡബാലനം
ആഹാര പരിണാമാര്‍ത്ഥം
സ്മരാമി ച വൃകോദരം

17. കിടക്കുന്നതിനു മുന്‍

കരചരണ കൃതംവാ
കായചം കര്‍മചം വാ
ശ്രവണ നയനചം വാ
മാനസം വാ അപരാധം
വിഹിതമവിഹിതം വാ
സര്‍വമേ തത് ക്ഷമസ്വാ
ജയ ജയ കരുണാബ്ധേ
ശ്രീ മഹാദേവ ശംഭോ

18. കിടക്കുമ്പോള്‍

രാമസ്കന്ധം ഹനുമന്ദം
വൈനതേയം വൃഗോദരം
ശയനേയസ്സ്മരനിത്യം
ദുഃസ്വപ്നം തസ്യ നസ്യതി
അച്യുതായ നമഃ
അനന്തായ നമഃ
വാസുകയേ നമഃ
ചിത്രഗുപ്തായ നമഃ
വിഷ്ണവേ ഹരയേ നമഃ

ഇത്രയും കാര്യങ്ങൾ നമ്മൾ ഹൃദിസ്ഥമാക്കുകയും കുട്ടികൾക്ക് പകർന്നു് നൽകുകയും ചെയ്യുക

Monday, March 19, 2018

ദേവമേളയിലെ  വൈകുണ്ഡദർശനവും  !

മഹത്തായ പാരമ്പര്യത്തിന്റെ ഒരുബാക്കിപത്രം ആണ് ഇന്നത്തെ പെരുവനം - ആറാട്ടുപുഴ പൂരങ്ങൾ . ഇരുപത്തിയെട്ടു ദിവസത്തെ ഉത്സവം എന്തോ ചില ദുർനിമിത്തങ്ങൾ കണ്ടത് കൊണ്ട് ഒരു ദിവസത്തെ പൂരം ആക്കി മാറ്റിയതാണ് ഇന്ന് കാണുന്ന പെരുവനം പൂരം  . പഞ്ചാരിയുടെയും, നെറ്റിപട്ടത്തിന്റെയും പരീക്ഷണ വിജയങ്ങളുടെ അവകാശം പെരുവനത്തിനു സ്വന്തം. പ്രസിദ്ധമായ പെരുവനം പൂരത്തിന്റെ ആറാട്ട്‌ ആണ് ആറാട്ടുപുഴയിൽ നടന്നിരുന്നത്.അത്  കാലത്തിന്റെ മാറ്റത്തിൽ ദേവമേളയായി രൂപാന്തരപെട്ട് ഒന്നും കൂടി പ്രസിദ്ധിയാർജ്ജിച്ചു  .അതിന്റെ സ്മരണ നില നിറുത്തുന്നതിനായി  ഇരുപത്തിയെട്ടു ദിവസം മുമ്പ്  ചേർപ്പ്‌ ഭഗവതിക്ഷേത്രത്തിൽ  കൊടിമരം നാട്ടി പിറ്റേദിവസം  തിരുവിള്ളക്കാവ് ക്ഷേത്രത്തിൽ  പൂരത്തിന് കൊടികയറുന്നു.  തൃപ്രയാർ തേവരുടെയും , ചേർപ്പ്‌ ഭഗവതിയുടെയും , ഊരകം അമ്മതിരുവടിയുടെയും മീന മകീരത്തിലെ പൂരം പുറപ്പാടോട് കൂടി തുടങ്ങുന്ന പത്തു ദിവസത്തെ പൂരക്കാലം ആയി പഴയ പെരുവനം പൂരം ചുരുങ്ങി എങ്കിലും അത് പഴയകാല പ്രൗഡിയോടെ തന്നെ നിൽക്കുന്നു.

ശാന്തത കളിയാടി നിൽക്കുന്ന അതികൂറ്റൻ ക്ഷേത്രമതിൽക്കകം, വിസ്മയിപ്പിക്കുന്ന വിളക്കുംമാടം , രാജകീയപ്രൗഡിയോടെ തലയുയർത്തി നിൽക്കുന്ന ക്ഷേത്രം  അതിലേറെ ശാന്തനായ ഇരട്ടയപ്പൻ . അതാണ്‌ പെരുവനം ക്ഷേത്രം .  തികഞ്ഞ ആനകൾ, അതിമാനോഹരങ്ങൾ ആയ ആന ചമയങ്ങൾ, അതിലേറെ തികഞ്ഞ മേളക്കാര് , , മുല്ല മൊട്ട് പോലെ പ്രകാശിക്കുന്ന പന്തങ്ങൾ പൂരത്തിന് മാത്രം ആയി നിർമ്മിച്ചതാണോ എന്ന് തോന്നിക്കുന്ന ഇടവഴി , പ്രൗഡമായിട്ടുള്ള സദസ്സ് , ഇതെല്ലം പെരുവനത്ത് മാത്രം കാണുന്ന ഒരു പൂര കാഴ്ച . വലിയ ആർഭാടങ്ങൾ ഇല്ലാതെ  ഇത്രയും ലളിതമായിട്ടുള്ളതും അതിമനോഹരം ആയ ഒരു  ഒരു പൂരം വേറെയുണ്ടോ എന്ന് തന്നെ സംശയം  .

ഒരു കാലത്ത് മത്സരത്തിനും തമ്മിൽ തമ്മിൽ ഉള്ള വടം വലിക്കും കേളികേട്ട പൂരം കൂടി ആയിരുന്നു. നിബന്ധനകളും നിയമങ്ങളും , അതിലേറെ മത്സരവും ഉള്ളതാണ് പെരുവനം പൂരം.  നെട്ടിശ്ശേരി ശാസ്താവ് വന്നു കയറിയാൽ പിന്നെ ആർക്ക് വേണമെങ്കിലും ചെന്ന് കയറാം , ചേർപ്പ്‌ ഭഗവതി വന്ന് ഇറങ്ങുന്നതിനു മുൻപ് എല്ലാവരും ഇറങ്ങുകയും ചെയ്യണം എന്ന നിബന്ധനയോടെ ആണ് പൂരം തുടങ്ങുന്നതും അവസാനിക്കുന്നതും. വൈകീട്ട് നാല് മണിയോടെ ക്ഷാരിക്കൽ ഭഗവതിയുടെ പഞ്ചാരിയോടെ പെരുവനം പൂരം തുടങ്ങുന്നു . അത് കഴിയുമ്പോഴേക്കും മതിൽക്കകത്ത്‌ ആറാട്ട്‌ പുഴ ശാസ്താവിന്റെ  മേളത്തിന് .കാലമിടുന്നു. പാണ്ടി തുടങ്ങി അവർ നടവഴിയിലേക്ക് ഇറങ്ങുമ്പോൾ മറ്റേ അറ്റത്തു ചാത്തക്കുടം ശാസ്താവ്,തെട്ടിപ്പാൾ ഭഗവതിയുമായി കൂട്ട് ചേർന്ന് പഞ്ചാരി തുടങ്ങുന്നു. ആദ്യം ആറാട്ട്‌ പുഴയുടെയും, പിന്നെ ചാത്തകുടത്തിന്റെയും മേളം അവസാനിക്കുന്നു . ഇതിനടയിൽ ദേവി ദേവന്മാർ മേളങ്ങൾക്ക് ഇടയിലൂടെ കയറി പോകുന്നതും ഇറങ്ങി പോകുന്നതും കാണാം. പിന്നെ  ചാത്തക്കുടം ശാസ്താവുമായി ചേർന്ന് അമ്മതിരുവടിയുടെ പൂരം. തന്റെ പൂരം കഴിഞ്ഞ  ചാത്തക്കുടം ശാസ്താവ്  തൊട്ടിപ്പാൾ ഭഗവതിയെ ഇരട്ടയപ്പന്റെ അടുത്ത് കൊണ്ടാക്കി തിരിച്ചു വന്ന്  കൂട്ട് നിന്നിട്ടേ അമ്മതിരുവടിക്ക് പൂരം തുടങ്ങാനും നടവഴിയിലേക്ക് കയറാനും പാടുള്ളൂ. പിന്നെ അമ്മതിരുവടിയുടെ  പഞ്ചാരി . ഈ മേളം പകുതി ആവുമ്പോൾ മതികകത്ത് നെട്ടിശ്ശേരി ശാസ്താവിന്റെ നേതൃത്ത്വത്തിൽ പതിനൊന്നു ദേവിദേവന്മാർ കൂട്ടി എഴുന്നെള്ളിച്ചു പഞ്ചാരിയോടെ പെരുവനം വിളക്ക് . ഇതേ സമയം ചേർപ്പ്‌ ഭഗവതി പഞ്ചവാദ്യവും ആയി പെരുവനം ക്ഷേത്രത്തിന്റെ പടിഞ്ഞാറ് ഭാഗത്ത് എത്തിയിട്ടുണ്ടാകും . ചേർപ്പ്‌ പഞ്ചവാദ്യം കഴിഞ്ഞ് അകത്തു വരുമ്പോഴേക്കും മറ്റുള്ളവർ ഇറങ്ങിക്കോളണം. ചേർപ്പ്‌ ഭഗവതി നടവഴിയിൽ പഞ്ചാരി കലാശിപ്പിക്കുന്നത് കാണാൻ തലേന്നു  ആറാട്ട്‌പുഴ ശാസ്താവിന്റെ  മേളത്തിന്  കാലം ഇടുന്നത് കണ്ടു ഉറങ്ങാൻ പോയ സുര്യഭഗവാൻ ഉറക്കച്ചുവടുമായി അങ്ങ് ദൂരെ വന്നുനിൽക്കുന്നുണ്ടാകും.

ഏതു പഞ്ചാരി ആണ് കേമം എന്ന് പറയാൻ  പറ്റാത്ത അത്ര അതിഗംഭീരങ്ങളായ പഞ്ചാരികൾ ആണ് പെരുവനം നടവഴിയിലേത്  . ഇനി ഇതിനേക്കാൾ മറികടക്കുന്നതാണോ നടവഴിയിലെ ആറാട്ട്‌പുഴ ശാസ്താവിന്റെ   ആ  ഒരു പാണ്ടിമേളം എന്നും പറയാൻ വിഷമം ആണ് . എല്ലാം കണ്ടു തീരുമാനിക്കുക തന്നെ വേണം പ്രസിദ്ധങ്ങളായ ആനകൾ തന്നെ ആണ് അവിടെ അണിനിരന്നിരുന്നതും ഇപ്പോൾ നിരക്കുന്നതും . പെരുവനം നടവഴിയിൽ മേളം കൊട്ടിയാലെ  മേളക്കാരൻ ആവുള്ളു .പെരുവനം നടവഴിയിൽ മേള പ്രമാണി ആയാൽ മാത്രേ മേളപ്രമാണിയായി അഗീരിക്കുകയുള്ളൂ. .  മഹാരഥന്മാർ ആയ മേളപ്രമാണിമാർ നിറഞ്ഞാടിയ നടവഴി കൂടി ആണ് പെരുവനം നടവഴി ...

പെരുവനം പൂരത്തിന്റെ ആറാട്ട്‌ എവിടെവേണം എന്നുള്ള പിടിക്ക പറമ്പിൽ ശങ്കരനോട് ചോദിക്കാൻ പോകുന്നു എന്ന സങ്കൽപ്പത്തിൽ ഉള്ള  പിടിക്കപറമ്പ് പൂരവും ആനയോട്ടവും  അത് കഴിഞ്ഞ് ദേവമേള എങ്ങനെ അതിഗംഭീരമാക്കണം ,അതിനു ആരോയൊക്കെ ക്ഷണിക്കണം എന്നുള്ള കൂടിയാലോചനയും എന്ന സങ്കൽപ്പത്തിലുള്ള തറക്കൽ പൂരത്തിനും മാറ്റങ്ങൾ ഒന്നും ഇല്ല്യാതെ നടന്നു വരുന്നു .

തൃപ്രയാർ തേവരുടെ കൂട്ടിയെഴുന്നെള്ളിപ്പാണ് ദേവമേള എന്ന സങ്കൽപ്പത്തിലുള്ള   ആറാട്ടുപുഴ പൂരം. ഭൂലോകവൈകുണ്ഡദർശനം എന്നാണു ഈ കൂട്ടിയെഴുന്നെള്ളിപ്പ് അറിയപ്പെടുന്നത്.ആറാട്ടുപുഴ പൂരം ചരിത്ര പ്രസിദ്ധം ആയത് തന്നെ ഇതുകൊണ്ടാണ് . . തൃപ്രയാർ തേവർക്ക് ആണ് ദേവമേളയുടെ നെടുനായകത്വം.ശ്രീരാമ സങ്കൽപ്പത്തിൽ ആണ് തൃപ്രയാർ തേവരുടെ പ്രതിഷ്ഠ.അതും മഹാരാജാവായിട്ടുള്ള ശ്രീരാമന്റെ.അവിടുത്തെ നിത്യനിതാനപൂജയും മറ്റുള്ള ചടങ്ങുകളും എഴുന്നെള്ളിപ്പും എല്ലാം ഒരു മഹാരാജാവിനു വേണ്ട  രാജകീയപ്രൗഡിയോടെ ആണ്. തേവരുടെ പൂരം പുറപ്പാടും ദേവമേളക്കുള്ള അദ്ധേഹത്തിന്റെ വരവും രാജകീയപ്രൗഡിയിൽ തന്നെ ആണ് .

മീന മാസത്തിലെ മകീരം നാളിൽ ആണ് പൂരത്തിനുള്ള തേവരുടെ പുറപ്പാട് . അതും കർക്കടകം രാശിയിൽ . , വേണ്ടപെട്ടവർ എല്ലാവരും എത്തിയോ , ആരെങ്കിലും പട്ടിണി കിടക്കുന്നുണ്ടോ, സങ്കടക്കാര് ആരെങ്കിലും ഉണ്ടോ എന്നൊക്കെ വിളിച്ചു ചോദിച്ചിട്ടാണ് പാണി കൊട്ടുക .അതുണ്ടെങ്കിൽ അത് മാറ്റിയിട്ടേ പാണി കൊട്ടുള്ളൂ എന്നാണ് പറയുന്നത് . പാണി കൊട്ടി മന്ധപത്തിൽ ഇറക്കി വച്ച് , ബ്രാഹ്മണിയമ്മ പാട്ട്. അത് കഴിഞ്ഞ് മണ്ഡപത്തിൽ പറ . അതിവിശേഷം ആണ് ആ സമയത്ത് മണ്ഡപത്തിൽ പറ നിറക്കുന്നത് . പിന്നെ പ്രസിദ്ധമായ പുറപ്പാട് , രണ്ടു നേരവും ആറാട്ട്‌ പല സ്ഥലങ്ങളിൽ , അതിനിടയിൽ കൃഷിയുമായി ബന്ധപെട്ട ചില കാര്യങ്ങൾ ഒക്കെയായി അങ്ങിനെ പൂരം വരെ .പിന്നെ ചരിത്ര പ്രസിദ്ധമായ ആറാട്ടുപുഴ പൂരത്തിന് എത്തി കൂട്ടി എഴുന്നിള്ളിപ്പും ആറാട്ടും കഴിഞ്ഞ് അടുത്ത പൂരം തിയതി അറിയിച്ച് തൃപ്രയാറിൽ മടങ്ങി ചെന്ന് അവിടെ ഉത്രം വിളക്കോടെ സമാപനം .

.  സന്ധ്യ മുതൽ പാടത്ത്പഞ്ചാരിയോടെ ആദ്യം ആറാട്ടുപുഴ ശാസ്താവിന്റെ പൂരം. പിന്നെ ചെറിയ ഒരു വെടികെട്ട്.അതുകഴിഞ്ഞ് തൊട്ടിപ്പാൾ ഭഗവതിയെ കൂട്ടിയുള്ള ചാത്തകുടം ശാസ്താവിന്റെ പഞ്ചാരി, നെട്ടിശ്ശേരി ശാസ്താവിന്റെ പാണ്ടി, എടക്കുന്നി ഭഗവതിയുടെ പഞ്ചാരി, അന്തിക്കാട് ഭഗവതിയും, ചൂരക്കോട് ഭഗവതിയും ചേർന്നുള്ള പഞ്ചാരി, പൂനിലാർക്കാവ് ഭഗവതിയും,ചാലക്കുടി പിഷാരിക്കൽ ഭഗവതിയും,കടുപ്പശ്ശേരി ഭഗവതിയും ചേർന്നുള്ള പഞ്ചാരി.കോടന്നൂർ,നാംങ്കുളം,ചക്കംകുളം,ചിറ്റിചാത്തകുടം,മേടംകുളം,കല്ലേലി ശാസ്താക്കന്മാരുടെയും,അയ്‌കുന്ന്,തൈക്കാട്ടുശ്ശേരി ഭഗവതിമാരുടെയും നിയമപ്രകാരം ഉള്ള കയറ്റിറക്കങ്ങൾ, ഇതിനടിയിൽ വിഷഹാരിണിയായ കടലാശ്ശേരി പിഷാരിക്കൽ ഭഗവതി പുഴയിൽ പോയി ആറാടി വന്നാൽ പിന്നെ മറ്റുള്ള ഭഗവതിമാർ ഓരോരുത്തരായി പോയി ആറാട്ട്‌.തേവര് വരുമ്പോഴേക്കും ഇതെല്ലം കഴിഞ്ഞിരിക്കും.

 
തൃപ്രയാർ തേവർ തന്റെ ഗുരുവിനെ കാണാൻ വരികയാണ് എന്നുള്ള ഒരു സങ്കല്പം കൂടി ദേവമേളക്കുണ്ട്. ഗുരു കാത്തു നിൽക്കുന്ന വിവരം അറിഞ്ഞത് കൊണ്ട് ആവാം തേവര് തൃപ്രയാറു നിന്ന് ശരവേഗത്തിൽ ആണ് വരിക . ഗുരുവിനെ അധികം കാത്തു നിറുത്താതിരിക്കാനും,മറ്റുള്ളവർ തന്നെ കാത്തു നിൽക്കുകയാണ്‌ എന്നുള്ള വ്യഗ്രതയും ആവാം ഇതിനു പിന്നിൽ ..

ആറാട്ടുപുഴ ശാസ്താവിന്റെ പ്രതിഷ്ഠ  വസിഷ്ഠ ഗുരു എന്ന സങ്കൽപ്പത്തിൽ ആണ് . ശ്രീരാമന്റെ  ഗുരു കൂടി ആണല്ലോ വസിഷ്ഠ മഹർഷി.പൂരത്തിന്റെ ആതിതേഥെയനും കൂടിയായ ആറാട്ടുപുഴ ശാസ്താവ് ശിഷ്യനും, മഹാരാജാവും ആയ ശ്രീരാമനെ സ്വീകരിക്കാൻ എന്ന സങ്കൽപ്പത്തിൽ ആണ് തന്റെ പൂരം കഴിഞ്ഞാൽ നിലപാട് തറക്കൽ നിൽക്കുന്നത്. അതിനടിയിൽ ആറാട്ടുപുഴ ശാസ്താവും , ചാത്തകുടം ശാസ്താവും എടക്കുന്നി ഭഗവതിയും കൂടി തേവര് ആറാട്ടുപുഴയിൽ എത്താറായി എന്ന് എല്ലാവരെയും അറിയിക്കുന്ന പട്ടിണി ശംഖു്എന്ന ചടങ്ങ് ഒരു ചെറിയ കൂട്ടി എഴുന്നെള്ളിപ്പ് രൂപത്തിൽ നടക്കും പിന്നെ എടക്കുന്നി ഭഗവതിയെ സാക്ഷിയാക്കി നിലപാട് നിൽക്കാൻ ചാത്തകുടം ശാസ്താവിനെ ഏൽപ്പിച്ച് ആറാട്ടുപുഴ ശാസ്താവ്അകത്തു പോകും.  എടക്കുന്നിയുടെ ഉപചാരവും അവിടെ കഴിയും പിന്നെ ആറാട്ട്‌ കഴിഞ്ഞ് സ്വദേശത്തേക്ക് .

തേവർ കൈതവളപ്പിൽ എത്തിയാൽ ആദ്യം ആയിരത്തിയൊന്നു കതിനാവെടികൾ മുഴങ്ങും. അത് കഴിഞ്ഞാൽ കൂട്ടിയെഴുന്നെള്ളിപ്പിനുളള ഒരുക്കങ്ങൾ തുടങ്ങുകയായി. സർവ്വശക്തയും ഭൂമിദേവിയും ആയ ചേർപ്പ്‌ ഭഗവതി നാല്പതോളം ആനകളുടെ അകമ്പടിയോടെ തൃപ്രയാർ തേവരുടെ വലതും, രാജരാജേശ്വരിയും ലക്ഷ്മി ദേവിയും ആയ ഊരകത്തമ്മതിരുവടി, പൂരത്തിന്റെ മുഴുവൻ ചുമതലയും ഉള്ള അതിശക്തനായ ചാത്തകുടം ശാസ്താവിന്റെ കൂടെ അത്രതന്നെ ആനകളുമായി തൃപ്രയാർ തേവരുടെ ഇടതുമായി നിരന്നാൽ കൂട്ടിയെഴുന്നെള്ളിപ്പ് തുടങ്ങായി. പിന്നെ ചേർപ്പിന്റെയും ഊരകത്തിന്റെയും മേള പ്രമാണിമാർ പാണ്ടി മേളത്തിന് കാലമിടുന്നു. മുത്തു കുടകൾ നിവർത്തി വെഞ്ചാമരവും ആലവട്ടവും വീശി പാണ്ടി മേളത്തിന്റെ നാദധാരയിൽ , എൺപതോളം ആനകൾ നിരന്നു നിൽക്കുന്നതിന് മുകളിലേക്ക് ഉദയസൂര്യൻ തന്റെ പൊൻകിരണങ്ങൾ വാരി വിതറുന്നത് അതിമനോഹരമായ ഒരു കാഴ്ച തന്നെയാണ്. അടിവച്ചടിവച്ച് താളത്തിൽ മുന്നേറി പാടവരമ്പ് അവസാനിക്കുന്നിടത്ത് നിന്ന് ദേവിദേവന്മാർ ആറാട്ട്‌ കടവിലേക്ക് നീങ്ങുന്നു .

മുപ്പത്തിമുക്കോടി ദേവതകളും, അവരുടെ ഭൂതഗണങ്ങളും. യക്ഷികളും, ഗന്ധർവ്വന്മാരും, പിതൃക്കളും, പിതാമഹന്മാരും മനുഷ്യ മഹാസമുദ്രത്തോടൊപ്പം സാക്ഷിയായിട്ടുള്ള ഈ കൂട്ടിയെഴുന്നെള്ളിപ്പ് വന്നു കണ്ടിട്ടാണ്" ഇതാണ് സാക്ഷാൽ വൈകുണ്ഡം"എന്ന്  വില്വമഗലം സ്വാമിയാർ പറഞ്ഞത്.

തേവര് ആറാട്ട്‌ കഴിഞ്ഞു വരുമ്പോഴേക്കും മറ്റുള്ള ദേവിദേവന്മാർ ആറാട്ടുപുഴ ശാസ്താവിനോട് യാത്ര പറഞ്ഞു പോകും തേവര് വന്ന് അടുത്ത കൊല്ലം പൂരം നടത്തേണ്ട തിയ്യതി അറിയിച്ചാൽ ആറാട്ടുപുഴ ശാസ്താവ് എഴുകണ്ടം വരെ അനുഗമിച്ച്തേവരെ യാത്രയാക്കുന്നതോടെ ദേവമേളക്ക് തിരശീല വീഴും.

തേവരുടെ കൂട്ടി എഴുന്നെള്ളിപ്പ് കാണുന്നത് വൈകുണ്ഡദർശനത്തിനു സമാനമാണ് എന്നും   പ്രദക്ഷിണം വച്ച് തൊഴുന്നത് സമസ്ത പാപപരിഹാരത്തിന് ഉപകരിക്കുമെന്നും പറയപെടുന്നു .

പെരുവനം പൂരം  2018 മാർച്ച്‌ 26

ആറാട്ടുപുഴ പൂരം  2018 മാർച്ച്‌  29

ശുഭചിന്ത

ഭയം, കോപം, നീരസം, സംഘര്‍ഷം ഇവയെല്ലാം നിങ്ങള്‍ മനസ്സില്‍ സ്വയം സൃഷ്ടിക്കുന്ന വിഷങ്ങളാണ്. മനസ്സിനെ സ്വന്തം നിയന്ത്രണത്തിലാക്കിയാല്‍, നിങ്ങള്‍ക്കു പരമാനന്ദത്തിന്‍റെ ഒരു രസതന്ത്രം സൃഷ്ടിക്കാന്‍ കഴിയും.

Fear, anger, resentment, and stress are poisons you create in your mind. If you take charge of your mind, you can create a chemistry of blissfulness.

സദ്‌ഗുരു വചനങ്ങൾ 

Sunday, March 18, 2018

വടയാര്‍ ഇളങ്കാവ് ദേവീക്ഷേത്രത്തിലെ ആറ്റുവേല ഉത്സവം


വൈക്കംവടയാര്‍ ഇളങ്കാവ് ദേവീക്ഷേത്രത്തിലെ പ്രസിദ്ധമായ ആറ്റുവേല ഉത്സവത്തിന് ഒരുക്കങ്ങള്‍ പൂര്‍ത്തിയായി. ഇനി അവശേഷിക്കുന്നത് ഒരുനാള്‍ മാത്രം. ആറ്റുവേല പഠിപ്പുരയില്‍ വെളിച്ചപ്പാടിന്റെയും ഭഗവതിയുടെയും തടിയില്‍ കൊത്തിയ രൂപങ്ങളും മറ്റും തയ്യാറായി കഴിഞ്ഞു .

ഇനി ചാട് അശ്വതി നാളില്‍ 18നാഴിക ഇരുട്ടുമ്പോള്‍ അഴിച്ചുവിടുന്നത് വരെ തട്ടും മുട്ടുംമായി ആരെങ്കിലും കാണും ചാടില്‍. കാരണം അനക്കമില്ലാതെ വെറുതെ ചാട് കിടക്കുവാന്‍ പാടില്ലെന്നാണ് പഴമക്കാരുടെ വിശ്വാസം.

ആറ്റുവേല ഉത്സവത്തിനു ആറ്റുവേലക്കടവില്‍ 14ന് കൊടികയറിയതോടെ ചടങ്ങുകള്‍ക്ക് തുടക്കമായി.
19, 20 തീയതികളിലാണ് ആറ്റുവേല ഉത്സവം. *നാളെയാണ്  (തിങ്കളാഴ്ച്ച)ലോക പ്രസിദ്ധിയാര്‍ന്ന ആറ്റുവേല.*

അന്നേദിവസം നദിയിലൂടെ ഒഴുകിയെത്തുന്ന ബഹുനില തട്ടുകളുള്ള ആറ്റുവേല ദര്‍ശിക്കാന്‍ വിവിധനാടുകളില്‍നിന്നായി പതിനായിരക്കണക്കിനു ഭക്തരാണ് എല്ലാവര്‍ഷവും വടയാര്‍ ക്ഷേത്രത്തിലും മൂവാറ്റുപുഴയാറിന്റെ ഇരുകരകളിലും വരവേല്‍ക്കുവാനും അമ്മയെ കണ്ട് അനുഗ്രഹം ഏറ്റുവാങ്ങുവാനും കാത്തുനില്‍ക്കുന്നത്. ആര്‍പ്പും കുരവയും മേളവും അരിയും പൂവും എറിയലും എല്ലാംകൊണ്ടും ഒരു മേളമാണ്.മൂവാറ്റുപുഴയാറിന്റെ ജലനിരപ്പിലൂടെ വട്ടം ചുറ്റി കറങ്ങി വരുന്ന ആറ്റുവേലയും അതിനു പുറകിലായി മേളങ്ങളോട് കൂടി ഗരുഡന്‍തൂക്കവും ഒന്നു കാണേണ്ട കാഴ്ച്ചതന്നെയാണ്.

ആറ്റുവേല പുറപ്പാട് കേരളത്തിലെ ക്ഷേത്രാചാരങ്ങളിലെ അപൂര്‍വമായ കാഴ്ചയാണ്. *കൊടുങ്ങല്ലൂരമ്മ അനുജത്തിയായ ഇളങ്കാവിലമ്മയെ കാണുന്നതിനും ഗ്രാമത്തിനാകെ അനുഗ്രഹങ്ങള്‍ ചൊരിയുന്നതിനുമായി എത്തുന്നു എന്നാണു ഇവിടുത്തുകാരുടെ സങ്കല്‍പം.ഭക്തര്‍ താളവും മേളവുമായി കൊടുങ്ങല്ലൂരമ്മയെ സ്വീകരിക്കുന്ന ചടങ്ങാണ് ആറ്റുവേല.വിവിധ തട്ടുകളിലായുള്ള ആറ്റുവേലയുടെ നിര്‍മാണം ഗ്രാമത്തിന്റെ ഒന്നാകെയുള്ള പ്രാര്‍ഥനയുടെ പൂര്‍ത്തീകരണമാണ്. ഐതിഹ്യവും ചരിത്രവും ഇഴചേര്‍ന്ന ആഘോഷമാണ് ആറ്റുവേല. മാത്രവുമല്ല ആറ്റുവേല തൊഴുത് മടങ്ങിയാല്‍ ഐശ്വര്യവും രോഗമുക്തിയും കൈവരിയുമെന്നാണ് വിശ്വാസം. അതുകൊണ്ടാണ് ഭക്തര്‍ ആറ്റുവേലച്ചാടില്‍ അരിയും പൂവും എറിയുന്നത് എന്നും പറയുന്നു.

ഏകദേശം 280 കേവുഭാരം വരുന്ന ആറ്റുവേലചാട് താങ്ങാന്‍ ശേഷിയുള്ള രണ്ടുകെട്ടുവള്ളങ്ങളാണ് ചാടിനെ കെട്ടിനിര്‍ത്താന്‍ ഇതിന് ഉപയോഗിക്കുന്നത്. ഇതിനു മുകളില്‍ പിണ്ടിപ്പൊഴുത് (അടിത്തറ) കെട്ടിയശേഷം ഒന്‍പതു കോല്‍ നീളവും ഏഴ് അംഗുലം സമചതുരത്തിലുള്ള നാലു തേക്കുതടികളും ഇതിനായി ഉപയോഗിക്കുന്നു. അഞ്ചാമതായി മുഖമണ്ഡപത്തിന്റെ ഭാഗത്ത് ഏഴുകോല്‍ നീളവും ഏഴ് അംഗുലത്തിലുള്ള ഒരു തടിയും കെട്ടി ഇതിന്റെ മുകളില്‍ തേക്കിന്‍ പലകകള്‍ നിരത്തി തട്ട് ഉണ്ടാക്കിയിട്ടുണ്ട്. ഉയരമുള്ളതും വണ്ണമുള്ളതുമായ 18 തടിത്തൂണുകളില്‍ മൂന്നു നിലകളോടുകൂടിയ ക്ഷേത്രമാണു നിര്‍മിക്കുന്നത്. ഇതിനു 18 കോല്‍ ഉയരവും 11 കോല്‍ ചുറ്റളവുമാണ് ഉണ്ടാവുക. ഇതില്‍ ആയിരത്തിയെട്ട് ചുറ്റുവിളക്ക്, നൂറ്റിയെട്ട് തൂക്കുവിളക്ക്, വാഴക്കുലകള്‍ തുടങ്ങിയവ കൊണ്ടു വര്‍ണ പ്രപഞ്ചമൊരുക്കി തീര്‍ത്തിരിക്കുകയാണ്.മൂന്നു നിലകളിലുള്ള ആറ്റുവേലച്ചാടിനു മുകളില്‍ താഴികക്കുടത്തിന്റെ സ്ഥാനത്ത് ഒന്നര കോല്‍ ഉയരത്തില്‍ വലിയ തീപ്പന്തമാണ് ആ സമയത്ത് തെളിക്കുന്നത്. കൊടുങ്ങല്ലൂര്‍ ഭഗവതിയുടെ തിടമ്പ് പ്രതിഷ്ഠ ശ്രീകോവിലിന്റെ മുകള്‍ ഭാഗത്താണ് വച്ചിരിക്കുന്നത്.

ഇതിനെല്ലാം പുറമെ സര്‍ണ്ണാഭരണ വിഭൂഷിണിയായ ദേവിക്കു പ്രത്യേകം തൂക്കുവിളക്കും,മറ്റു ഭാഗങ്ങളിലായി അനന്തശയനം, ഭീഷ്മര്‍, വെളിച്ചപ്പാട് എന്നീ ദാരുശില്‍പങ്ങളും സ്ഥാപിച്ചിട്ടുണ്ട്.

തലമുറകളില്‍ നിന്നും തലമുറകളിലേക്ക് പാരമ്പര്യമായി കൈമാറിവരുന്ന ആചാരാനുഷ്ടാനങ്ങള്‍ പാലിച്ചാണ് കൊടിയേറ്റ് മുതലുള്ള ആറ്റുവേലയുടെ വിവിധ ചടങ്ങുകള്‍ നടക്കുക. അവകാശികളായ കുടുംബക്കാര്‍ക്കാണ് ആറ്റുവേലച്ചാടിന്റെ നിര്‍മ്മാണച്ചുമതല. വടക്കുംകൂര്‍ രാജവംശത്തിന്റെ കുടുംബദേവതയായ ഇളങ്കാവിലമ്മയുടെ ആറ്റുവേലച്ചാട് നിര്‍മ്മിക്കുന്നതിന് ദേശക്കാരില്‍ ചിലര്‍ക്ക് കരമൊഴിയായി ഭൂമിയും മറ്റ് ചില ആനുകൂല്യങ്ങളും രാജാവ് നല്‍കിയിരുന്നു. പിന്നീട് ഈ ആചാരങ്ങള്‍ ഓരോ കുടുംബത്തിലെയും ഇളമുറക്കാര്‍ ഏറ്റെടുത്തു നടത്തുകയാണ് ചെയ്യുന്നത്. അതി വിശേഷമേറിയതും പ്രസിദ്ധിയാര്‍ജിച്ചതുമായ ജലനിരപ്പിലൂടെയുളള മനോഹരമായ ആ കാഴ്ച കാണുവാനും ദേവിയുടെ എഴുന്നളളിപ്പിലൂടെ സര്‍വ്വഐശ്വര്യവും കടന്നുവരുവാനുമുളള ആ ഒരു നിമിഷത്തിനായി കാത്തിരിക്കുയാണ് ഇവിടുത്തെ ഭക്തജനങ്ങള്‍.