താതിരിവൃക്ഷം

        ശിവന്റെ കോപാഗ്നിയിൽനിന്നും ഭൈരവൻ എന്നുപേരുള്ള ഒരു ഉഗ്രമൂർത്തി ജനിച്ചു.അതിശക്തനായ ഈ ശിവഭൂതം ശിവന്റെ ആജ്ഞ കൂടാതെ ദേവന്മാരെ തോല്പിച്ച് തന്റെ കീഴിലാക്കി.ഇതറിഞ്ഞ ശിവൻ കോപിച്ചു.അദ്ദേഹം ഭൈരവനെ ശപിച്ച് താതിരിവൃക്ഷമാക്കി. ഈ വൃക്ഷത്തിന്റെ പൂവാണ് അരിഷ്ടാസവങ്ങൾക്ക് ശക്തിവർദ്ധിക്കുവാൻ ചേർക്കുന്ന താതിരിപൂവ്.പിന്നീട് ദയ തോന്നിയ ശിവൻ ആ വൃക്ഷത്തെ എല്ലാവരും പൂജിക്കട്ടെ എന്ന് അനുഗ്രഹിച്ചു.

വിശ്വനാഥനെന്നതും  ഭൈരവനെന്നതും ശിവന്റെ പര്യായങ്ങളിൽ പെടുന്ന പേരുകളാണ്.ഭൈരവപൂജയ്ക്കുള്ള മുഖ്യദിവസങ്ങൾ ഞായറാഴ്ചയും ചൊവ്വാഴ്ചയുമാണ്. ഭൂതപ്രേതബാധകളെ ഒഴിവാക്കുവാൻ ഈ ദിവസങ്ങളിൽ ഭൈരവപൂജ നടത്താറുണ്ട്.

ധനുമാസത്തിലെ കറുത്ത പക്ഷത്തിൽവരുന്ന അഷ്ടമിദിവസമാണ് ഭൈരവജയന്തിദിനമായി ആചരിച്ചു വരുന്നത്. ഈ ദിവസത്തെ കാലാഷ്ടമി എന്നാണ് അറിയപ്പെടുന്നത്.അന്ന് ഭൈരവവാഹനമായ പട്ടിയേയും ആരാധിക്കാറുണ്ട്.

ശിവൻ ആനന്ദനൃത്തമാടുന്ന ഭാവത്തിന് ആനന്ദഭൈരവൻ എന്ന് പറയും. ഈ ഭാവത്തോട് ചേർന്ന് നൃത്തമാടുന്ന ദേവി ആനന്ദഭൈരവിയുമാണ്.ഭൈരവന് എട്ട് നാമങ്ങൾ ഉള്ളതുപോലെ ആനന്ദഭൈരവിയായ ദേവിക്കും എട്ട് പേരുകളുണ്ട്. അവ രുദ്രചർച്ചിക, രുദ്രചണ്ഡിക, നടേശ്വരി, മഹാലക്ഷ്മി, സിദ്ധചാമുണ്ഡിക, സിദ്ധയോഗേശ്വരി,ഭൈരവി, രൂപവിദ്യ ഇങ്ങനെയാകുന്നു.