ഭൂതയജ്ഞം (ബലിവൈശ്വദേവയജ്ഞം)
ദിവസവും പക്ഷിമൃഗാദികള്‍ക്ക്, പാവപ്പെട്ടവര്‍ക്ക്, രോഗികള്‍ക്ക്, പതിതര്‍ക്ക് ഭക്ഷണം കൊടുക്കാന്‍ ഒരു ഗൃഹസ്ഥന്‍ തയ്യാറാകണം. എവിടെയാണ് ഈശ്വരന്‍? ബ്രഹ്മയജ്ഞം ചെയ്യുമ്പോള്‍ നമ്മുടെ ഉള്ളിലുള്ള ഈശ്വരനെയാണ് കണ്ടെത്തുന്നത്. അഗ്നിഹോത്രം ചെയ്യുമ്പോള്‍ അഗ്നിയിൽ ഈശ്വരനെ ദര്‍ശിക്കുന്നു. പിതൃയജ്ഞം ചെയ്യുമ്പോള്‍ നമ്മുടെ അച്ഛനമ്മമാർ, പിതൃക്കൾ ആചാര്യൻ ഇവരിൽ ഈശ്വരനെ ദര്‍ശിക്കുന്നു. ബലിവൈശ്വദേവയജ്ഞം ചെയ്യുമ്പോള്‍ സര്‍വ്വ ചരാചരങ്ങളിലും ഈശ്വരനെ കാണാന്‍ കഴിയുന്നു. വളര്‍ത്തുമൃഗങ്ങളെ ഊട്ടുക, തുളസിക്കും ആലിനും, കൂവളത്തിനുമൊക്കെ വെള്ളമൊഴിച്ചു കഴിഞ്ഞിട്ടേ പണ്ടു വീട്ടുകാര്‍ ആഹാരം കഴിച്ചിരുന്നുള്ളൂ.
സകല ചരാചരങ്ങളോടുമുള്ള പ്രതിബദ്ധതയാണ് ഭൂതയജ്ഞത്തിന്റെ അടിസ്ഥാനം. പ്രപഞ്ചത്തിലെ ഏല്ലാ ജീവജാലങ്ങളെയും നമ്മളാൽ കഴിയുംവിധം പോഷിപ്പിക്കേണ്ടത് നമ്മുടെ കടമയാണ്. എണ്ണിയാലൊടുങ്ങാത്ത വൈവിദ്ധ്യങ്ങളോടെ സൃഷ്ടിക്കപ്പെട്ടിട്ടുള്ള ചരാചരങ്ങളെല്ലാം സഹോദരങ്ങളായി നമുക്ക് കാണാൻ കഴിയണം. ആ ഹൃദയവിശാലത ഉണ്ടെങ്കിൽ മാത്രമേ ഭൂതയജ്ഞത്തിന്റെ പൊരുൾ മനസ്സിലാവുകയുള്ളൂ.
മുന്‍തലമുറകള്‍ പാലിച്ചതുപോലെ കുടുംബസങ്കല്‍പവും ധര്‍മ്മാചരണവും ഉയര്‍ത്തിപ്പിടിക്കാന്‍ ഇന്നത്തെ സമൂഹത്തിനു സാധിക്കാതെ പോകുന്നത് ദൗര്‍ഭാഗ്യകരമാണ്. ദേശകാലങ്ങളനുസരിച്ച് പഞ്ചമഹായജ്ഞങ്ങളുടെ ബാഹ്യ ചടങ്ങുകൾക്ക് മാറ്റങ്ങൾ ഉണ്ടാകാമെങ്കിലും യജ്ഞാർത്ഥമെന്ന ഉദ്ദേശവും അതിന്റെ സദ്ഫലങ്ങളിലും മാറ്റമുണ്ടാകുന്നില്ല. ജീവിതത്തിന് മാറ്റമില്ലാത്ത ഒരു ലക്ഷ്യമുണ്ടെന്നറിഞ്ഞ് യജ്ഞാർത്ഥമായി കർമ്മം ചെയ്യുമ്പോൾ സർവ്വ ശ്രേയസ്സും വന്ന് ഭവിക്കുന്നു.
തുടരും......
©സദ്ഗമയ സത്സംഗവേദി
No comments:
Post a Comment