പാലാഴി മഥനകഥ മഹാഭാരതം

പാലാഴി മഥനകഥ മഹാഭാരതം, രാമായണം, മറ്റ് പുരാണങ്ങള്‍ എന്നിവകളില്‍ കാണാം. ആ കഥയാവട്ടെ ഇന്ന്.

ക്ഷിപ്രകോപിയായ ദുര്‍വ്വാസാവ് മഹര്‍ഷി ഒരിക്കല്‍ ദേവലോകത്തെത്തി. ദേവരാജാവായ ദേവേന്ദ്രനെ കാണുകയാണ് മഹര്‍ഷിയുടെ ആഗമനോദ്ദേശം. മഹര്‍ഷിയെ ഇന്ദ്രദേവന്‍ വളരെ ബഹുമാനത്തോടടെ സ്വീകരിച്ചാനയിച്ചു.  ഇന്ദ്രന്റെ ആതിഥ്യമര്യാദയില്‍ സന്തുഷ്ടനായ ദുര്‍വ്വാസാവ് സ്വന്തം കഴുത്തില്‍ അണിഞ്ഞിരുന്ന ദിവ്യമായ പൂമാല ദേവേന്ദ്രനു സമ്മാനിച്ചു.


എന്നാല്‍ പൂമാല, ഇന്ദ്രന്‍ സ്വന്തം വാഹനമായ ഐരാവതത്തിനെ അണിയിച്ചു. മാലയിലെ പൂക്കളുടെ സുഗന്ധം മൂലം വണ്ടുകള്‍ മൂളിപ്പാഞ്ഞെത്തി. ഇതുസഹിക്കവയ്യാതെ ഐരാവതം മാല കഴുത്തില്‍ നിന്ന് ഊരി, നിലത്തിട്ട് ചവിട്ടി. ഇതുകണ്ടുനിന്ന ദുര്‍വ്വാസാവ് കോപം കൊണ്ടു ജ്വലിച്ചു. വൈകാതെ മഹര്‍ഷിയുടെ ഉഗ്രശാപവും വന്നു, "ദേവേന്ദ്രനും ദേവഗണങ്ങളും ജരാനരകള്‍ ബാധിച്ച വൃദ്ധന്‍മാരായി മാറട്ടെ". ശാപമോക്ഷത്തിനായി ദേവേന്ദ്രനും ദേവന്‍മാരും മഹാവിഷ്ണുവില്‍ അഭയം തേടി. ജരാനര മാറാന്‍ പാലാഴി കടഞ്ഞെടുക്കുന്ന അമൃത് ഭക്ഷിച്ചാല്‍ മതിയാകുമെന്ന് മഹാവിഷ്ണു ഉപദേശിച്ചു.


ദേവന്‍മാര്‍ക്ക് ഒറ്റയ്‍ക്ക് പാലാഴി കടയാന്‍ പറ്റില്ല. അതിനായി ദേവേന്ദ്രന്‍ അസുരന്‍മാരുടെ സഹായം തേടി.

ത്രിമൂർത്തിമാരുടെ അനുഗ്രഹാശിസ്സുകളോടെ ദേവന്മാർ അസുരന്മാരെയും പാലാഴിമഥനത്തിനു ക്ഷണിച്ചു. കടക്കോലായി മന്ദരപർവ്വതത്തേയും കയറായി വാസുകി എന്ന നാഗശ്രേഷ്ഠനേയും നിശ്ചയിച്ചു. വാസുകിയുടെ തലഭാഗം അസുരന്മാരും, വാൽഭാഗം ദേവന്മാരും പിടിച്ചു വലിക്കാൻ തുടങ്ങി. വലിയുടെ ശക്തിയിൽ മന്ദരപർവ്വതം തഴ്ന്നുപോയി. താഴ്ന്നുപോയ പർവ്വതത്തെ ഉയർത്താൻ വിഷ്ണു തന്റെ രണ്ടാമത്തെ അവതാരം കൂർമ്മം ആയി അവതരിച്ചു. കൂർമ്മാവതാരം മന്ദരപർവ്വതത്തെ യഥാസ്ഥാനത്തേക്ക് ഉയർത്തി കൊണ്ടുവന്നു.



വീണ്ടും പാലാഴിമഥനം തുടർന്നു, കുറച്ചു നേരത്തെ പാലാഴി കടയലിൽ വാസുകി അസ്ഥാരസ്യം വന്നു ഛർദ്ദിക്കുകയും, കാളകൂടം എന്ന മാരകവിഷം പുറത്തുവരികയും ചെയ്തു. ലോകനാശകാരകമായ ആ വിഷം പരമശിവൻ പാനം ചെയ്തു. വിഷം അകത്തു പോകാതിരിക്കാൻ പാർവതി ശിവന്റെ കഴുത്തും പുറത്തേക്കു പോകാതിരിക്കാൻ വിഷ്ണു വായയും അടച്ചുപുടിച്ചു. മറ്റു ദേവന്മാർ പരമശിവനു വേണ്ടി പ്രാർത്ഥിച്ചു. അങ്ങനെ വിഷം പരമശിവന്റെ കണ്ഠത്തിൽ അടിഞ്ഞുകൂടി നീലനിറമായി. അതിലൂടെയാണ് ശിവന് നീലകണ്ഠൻ എന്ന പേര് ലഭിക്കുകയും ചെയ്തത് എന്നാണ് പറയപ്പെടുന്നത്. ഈ ദിവസമാണ് ശിവരാത്രിയായി ആചരിക്കുന്നത്.



വീണ്ടും പാലാഴിമഥനം തുടർന്നപ്പോൾ പലതരം ദിവ്യവസ്തുക്കളും ഉയർന്നുവന്നു. അവസാനം ധന്വന്തരി അമൃത് കുംഭവും കൊണ്ട് പുറത്തുവന്നു. ഉടനെ അസുരന്മാർ അമൃത് തട്ടിയെടുത്തുകൊണ്ട് പാതാളത്തിലേക്ക്‌ പോയി. ദേവന്മാർ രക്ഷിക്കുന്നതിനായി വീണ്ടും വിഷ്ണുവിന്റെ അടുത്തു അഭയംതേടി. വിഷ്ണു മോഹിനിരൂപത്തിൽ അസുരന്മാരുടെ അടുത്തെത്തി തന്ത്രപൂർവം അമൃത് കൈക്കലാക്കി ദേവന്മാർക്ക് കൊടുത്തു.