ദ്രോണാചാര്യർ

ഗൗതമ മഹർഷിയുടെ പുത്രനായിരുന്നു ശരദ്വാൻ.ധനുർവ്വേദത്തിൽ ആകൃഷ്ടനായ ശരദ്വാൻ തപസ്സു ചെയ്ത് ദിവ്യാസ്ത്രങ്ങളെല്ലാം നേടിയെടുത്തു. ശരദ്വാന് കൃപൻ എന്നും കൃപി എന്നും പേരുള്ള രണ്ടു കുട്ടികൾ ഉണ്ടായിരുന്നു. ശന്തനുവിന്റെ കാലം മുതലേ കൃപൻ ഹസ്തിനപുരത്തിൽ വളർന്നു.അച്ഛനിൽ നിന്ന് ധനുർവ്വേദം പഠിച്ച കൃപൻ രാജകുമാരന്മാരുടെ ആചാര്യനായി.


ദ്രോണാചാര്യർ ഹസ്തിനപുരത്ത് എത്തിച്ചേർന്നു. ഭീഷ്മർ അദ്ദേഹത്തെ സ്വീകരിച്ച് കൊട്ടാരത്തിൽ താമസിപ്പിച്ച് രാജകുമാരന്മാരെ ശസ്ത്രാസ്ത്രവിദ്യകൾ അഭ്യസിപ്പിക്കാൻ ചുമതലപ്പെടുത്തി. പൃഷതൻ എന്ന പാഞ്ചാലരാജാവിന്റെ പുത്രനായ ദ്രുപദൻ ഭരദ്വാജാശ്രമത്തിൽ താമസിച്ചു പഠിച്ചിരുന്നു. ഭരദ്വാജന്റെ മകനായ ദ്രോണരും, പാഞ്ചാല രാജാവിന്റെ പുത്രനായ ദ്രുപദനും കളിക്കൂട്ടുകാരായിരുന്നു.


പൃഷതനു ശേഷം ദ്രുപദൻ പാഞ്ചാല രാജാവായി. ദ്രോണർ കൃപാചാര്യരുടെ സഹോദരിയായ കൃപിയെ വിവാഹം ചെയ്യുകയും അവർക്ക് അശ്വത്ഥാമാവ് എന്നു പേരുള്ള പുത്രൻ ജനിക്കുകയും ചെയ്തു.


പരശുരാമൻ തനിക്കുള്ളതെല്ലാം ബ്രാഹ്മണർക്ക് ദാനം ചെയ്യുന്നു എന്നറിഞ്ഞ ദ്രോണർ അവിടെച്ചെന്ന് ഭൂസ്വത്തിനായി അപേക്ഷിച്ചു.പരശുരാമനാകട്ടെ ഭൂസ്വത്തെല്ലാം കശ്യപനും, മറ്റു ധനസമ്പത്തെല്ലാം ബ്രാഹ്മണർക്കും കൊടുത്തു കഴിഞ്ഞിരുന്നു. അദ്ദേഹം പറഞ്ഞു ഇനി അമൂല്യമായ ശസ്ത്രാസ്‌ത്രങ്ങളും ,എന്റെ ഉടലും മാത്രമെ അവശേഷിക്കുന്നുള്ളൂ. ഇതിൽ ഏതു വേണമെന്ന് അങ്ങയ്ക്ക് തീരുമാനിക്കാം. ദ്രോണരാകട്ടെ സമസ്ത അസ്ത്രങ്ങളും, അവയുടെ പ്രയോഗത്തിലുള്ള ഗൂഢതത്വവും, സംഹാര ക്രമവും സഹിതം തരണമെന്ന് അപേക്ഷിച്ചു. പരശുരാമൻ സകല ദിവ്യാസ്ത്രങ്ങളും, ധനുർവ്വേദരഹസ്യവും ദ്രോണർക്ക് നൽകി.


ദ്രോണർ പിന്നെ ദ്രുപദന്റെ അടുത്തേക്ക് ചെന്നപ്പോൾ ദരിദ്രബ്രാഹ്മണനായ പഴയ തോഴനെ അദ്ദേഹം സ്വീകരിക്കാൻ തയ്യാറായില്ല ദു:ഖിതനായ ദ്രോണർ ഹസ്തിനപുരത്ത് എത്തി.ഒരിക്കൽ രാജകുമാരന്മാർ ഒരു മൈതാനത്ത് കളിക്കുന്ന സമയത്ത് അവരുടെ പന്ത് പൊട്ടക്കിണറ്റിൽ വീഴുകയും, ദ്രോണർ കുശപ്പുല്ലുകൾ പറിച്ച് അസ്ത്രമാക്കി എയ്ത് ആ  പന്ത് കിണറ്റിൽ നിന്നെടുക്കുകയും ചെയ്തു.ഈ വിവരം അറിഞ്ഞാണ് ഭീഷ്മർ ദ്രോണാചാര്യരെ വിളിച്ച് ഹസ്തിനപുരത്ത് താമസിപ്പിച്ച് രാജകുമാരന്മാരെ അസ്ത്രവിദ്യ പഠിപ്പിക്കുവാൻ നിയോഗിച്ചത്.